കണ്ണൂര്‍: കണ്ണൂര്‍ വിമാനത്താവളത്തില്‍നിന്ന് സര്‍വിസ് നടത്തുന്ന എയര്‍ഇന്ത്യ എക്‌സ്പ്രസ് വിമാനങ്ങളുടെ ടിക്കറ്റ് ബുക്കിങ് ഇന്ന് അര്‍ധരാത്രി തുടങ്ങിയേക്കും. ഇന്നലെ അര്‍ധരാത്രി മുതല്‍ ടിക്കറ്റ് ബുക്കിങ് ആരംഭിക്കുമെന്നാണ് അധികൃതര്‍ നേരത്തെ അറിയിച്ചിരുന്നത്.
എന്നാല്‍ ഡയരക്ടറേറ്റ് ജനറല്‍ ഓഫ് സിവില്‍ ഏവിയേഷന്‍ (ഡി.ജി.സി.എ) സാങ്കേതിക അനുമതി വൈകിയതാണ് ടിക്കറ്റ് ബുക്കിങ് ആരംഭിക്കുന്നതു വൈകിയതെന്ന് എയര്‍ഇന്ത്യ എക്‌സ്പ്രസ് അധികൃതര്‍ അറിയിച്ചു. ഇന്ന് അനുമതി ലഭിച്ചേക്കുമെന്നും അര്‍ധരാത്രി ബുക്കിങ് ആരംഭിക്കാന്‍ കഴിയുമെന്നാണു പ്രതീക്ഷയെന്നും അധികൃതര്‍ വ്യക്തമാക്കി.
വിമാനത്താവള ഉദ്ഘാടന ദിവസമായ ഡിസംബര്‍ ഒന്‍പതിന് എയര്‍ഇന്ത്യ എക്‌സ്പ്രസ് മാത്രമാണ് കണ്ണൂരില്‍നിന്നു സര്‍വിസ് നടത്തുക.
രാവിലെ 11ന് അബൂദബിയിലേക്കു പുറപ്പെടുന്ന വിമാനം യു.എ.ഇ സമയം ഉച്ചയ്ക്ക് 1.30ന് അവിടെയെത്തും. യു.എ.ഇ സമയം 2.30ന് അബൂദബിയില്‍നിന്നു പുറപ്പെട്ട് രാത്രി എട്ടിന് കണ്ണൂരില്‍ എയര്‍ഇന്ത്യ എക്‌സ്പ്രസിന്റെ ആദ്യ വിമാനം യാത്രക്കാരുമായി കണ്ണൂരില്‍ പറന്നിറങ്ങും. ദുബൈ, ഷാര്‍ജ, മസ്‌ക്കത്ത്, ദോഹ എന്നിവിടങ്ങളിലേക്കും കണ്ണൂരില്‍നിന്ന് എയര്‍ഇന്ത്യ എക്‌സ്പ്രസ് സര്‍വിസ് നടത്തും.
അതേസമയം കണ്ണൂരില്‍നിന്ന് സര്‍വിസ് നടത്താന്‍ കിയാലുമായി ധാരണയിലെത്തിയ സ്വകാര്യ വിമാനക്കമ്പനിയായ ഇന്‍ഡിഗോ ഡിസംബറില്‍ കണ്ണൂരില്‍നിന്ന് സര്‍വിസ് തുടങ്ങാന്‍ സാധ്യതയില്ല. ജനുവരിയില്‍ കണ്ണൂരില്‍നിന്ന് സര്‍വിസ് തുടങ്ങാനാണ് ഇവരുടെ നീക്കം. കേന്ദ്രസര്‍ക്കാരിന്റെ ചെലവുകുറഞ്ഞ ആഭ്യന്തര വിമാനയാത്രാ പദ്ധതിയായ 'ഉഡാനി'ല്‍ (ഉഡോ ദേശ് കാ ആം നാഗരിക്) പദ്ധതിയുടെ ഭാഗമായി കണ്ണൂരില്‍നിന്ന് സര്‍വിസ് നടത്തുന്ന വിമാനക്കമ്പനിയാണ് ഇന്‍ഡിഗോ.