തിരൂര്‍: മുതിര്‍ന്ന വിദ്യാര്‍ഥികളുടെ മര്‍ദനത്തിനിരയായ വിദ്യാര്‍ഥി തിരൂര്‍ ജില്ലാ ആശുപത്രിയില്‍ ചികിത്സയില്‍. തിരുന്നാവായ നവാമുകുന്ദ ഹയര്‍സെക്കന്‍ഡറി സ്‌കൂളിലെ പ്ലസ് വണ്‍ വിദ്യാര്‍ഥിയായ മുഹമ്മദ് ഫായിസി(17)നെയാണു തലക്കും നെറ്റിയിലും പരുക്കേറ്റ് ആശുപത്രിയിലെത്തിയത്. പ്ലസ്ടു വിദ്യാര്‍ഥികളായ മുഹമ്മദ് ശിബില്‍, മുഹമ്മദ് ഐമന്‍ ഇസ്മാഈല്‍, മുഹമ്മദ് ശാഹില്‍ തുടങ്ങിയ വിദ്യാര്‍ഥികളുടെ നേതൃത്വത്തിലുളള സംഘം തന്നെ മര്‍ദ്ദിക്കുകയായിരുന്നെന്നു വിദ്യാര്‍ഥി പറഞ്ഞു.
ഇന്നലെ  സ്‌കൂള്‍ ഇടവേള  സമയത്ത് പുറത്തേക്കിറങ്ങിയ തന്നെ താടി വളര്‍ത്തരുതെന്നും ഷൂ ധരിക്കരുതെന്നും പറഞ്ഞു മുതിര്‍ന്ന  വിദ്യാര്‍ഥികള്‍ മര്‍ദിക്കുകയായിരുന്നുവെന്ന് ഫായിസ് പറഞ്ഞു. അക്രമത്തില്‍ ഫായിസിന്റെ തലയ്ക്കും ഇടതു കണ്ണിനു മുകളിലും പരുക്കേറ്റിട്ടുണ്ട്.  മര്‍ദിച്ചവര്‍ക്കെതിരേ നടപടിയെടുക്കണമെന്നാവശ്യപ്പെട്ട് ഫായിസ് സ്‌കൂള്‍ പ്രിന്‍സിപ്പലിനു പരാതി നല്‍കിയിട്ടുണ്ട്.