ഹാറൂന്‍ റഷീദ്

ഇന്ത്യന്‍ സൂപ്പര്‍ ലീഗിന്റെ ആറാം എഡിഷന് തിരശ്ശീല ഉയരാന്‍ പോവുകയാണ്. എട്ട് ദിവസങ്ങള്‍കൂടി കഴിഞ്ഞാല്‍ ഐ.എസ്.എല്ലിന്റെ ആര്‍പ്പുവിളികളും ആരവങ്ങളും ഉയരുകയായി. പത്ത് ക്ലബുകളാണ് ഇത്തവണ ഐ.എസ്.എല്ലില്‍ പന്ത് തട്ടുന്നതിന് വേണ്ടി രംഗത്തെത്തിയിട്ടുള്ളത്. ഇത്തവണ ഐ.എസ്.എല്ലിന് കാര്യമായ മാറ്റങ്ങളുണ്ട്. രാജ്യത്തെ പ്രധാന ഫുട്‌ബോള്‍ ലീഗാക്കി ഉയര്‍ത്തി എന്നതാണ് പ്രധാന പ്രത്യേകത. ഐ.എസ്.എല്ലില്‍ ഫൈനലിലെത്തുന്നവര്‍ക്ക് എ.എഫ്.സി കപ്പിനുള്ള യോഗ്യത ലഭിക്കുമെന്നതാണ് ഇതില്‍ പ്രധാനം. നേരത്തെ ഐ.ലീഗ് ഫൈനലിസ്റ്റുകളും എ.എഫ്.സി മത്സരങ്ങള്‍ക്ക് ഉണ്ടായിരുന്നു. എന്നാല്‍ ഇനിമുതല്‍ ഐ.എസ്.എല്‍ ക്ലബുകള്‍ മാത്രമായിരിക്കും ഇതില്‍ പങ്കെടുക്കുക. കഴിഞ്ഞ സീസണില്‍ ഉണ്ടായിരുന്ന പൂനെ സിറ്റി പിരിച്ചുവിട്ട് പകരം ഹൈദരാബാദ് എഫ്.സി എന്ന പേരില്‍ പുതിയ ടീമാണ് ഐ.എസ്.എല്ലിലെത്തിയിട്ടുള്ളത്. നേരത്തെ പൂനെ സിറ്റിയിലുണ്ടായിരുന്ന മുന്‍നിര താരങ്ങളെ ഉള്‍പ്പെടുത്തിയാണ് ഹൈദരാബാദ് ആസ്ഥാനമായി ഹൈദരാബാദ് എഫ്.സി എന്ന പേരില്‍ പുതിയ ടീമിനെ ഒരുക്കിയിട്ടുള്ളത്. കഴിഞ്ഞ സീസണിലുണ്ടായിരുന്ന ഡല്‍ഹി ഡൈനാമോസ് ഇത്തവണ പുതിയ പേരിലാണ് എത്തിയിട്ടുള്ളത്. ആസ്ഥാനം ഒഡിഷയിലെ ഭുവനേശ്വറിലേക്ക് മാറ്റി ഒഡിഷ എഫ്.സി എന്ന പേരിലാണ് ഡല്‍ഹി ഡൈനാമോസ് ഇപ്പോള്‍ മത്സരിക്കുന്നത്.