കാബൂള്‍: പാകിസ്താന്‍ സര്‍ക്കാരിന്റെ ഹെലികോപ്ടര്‍ കിഴക്കന്‍ അഫ്ഗാനിസ്ഥാനിലെ താലിബാന്‍ മേഖലയില്‍ ഇടിച്ചിറക്കി. യാത്രക്കാരായ ഏഴു പേരെ താലിബാന്‍ ബന്ദികളാക്കി. പാകിസ്താന്‍ അതിര്‍ത്തിയോട് ചേര്‍ന്ന അഫ്ഗാനിലെ ലോഗാര്‍ പ്രവിശ്യയിലാണ് ഹെലികോട്പടര്‍ യന്ത്രത്തകരാറിനെ തുടര്‍ന്ന് ഇടിച്ചിറക്കിയത്. ഹെലികോപ്ടര്‍ വെടിവച്ചിട്ടതല്ലെന്നും ഇടിച്ചിറക്കുകയായിരുന്നുവെന്നും ലേഗാര്‍ പ്രവിശ്യാ ഗവര്‍ണര്‍ സമീം സലേഹ് റോയിട്ടേഴ്‌സിനോട് പറഞ്ഞു.

പാക് വിദേശകാര്യ വക്താവ് നഫീസ് സകരിയ്യയും ഹെലികോപ്ടര്‍ ഇടിച്ചിറക്കിയ വിവരം സ്ഥിരീകരിച്ചു. പഞ്ചാബ് പ്രവിശ്യാ സര്‍ക്കാരിന്റെ ഹെലികോപ്ടറാണ് ലോഗാറില്‍ ഇറക്കിയതെന്നും യാത്രക്കാരെ കുറിച്ച് വിവരമില്ലെന്നും അദ്ദേഹം പറഞ്ഞു. സംഭവത്തെ കുറിച്ച് അന്വേഷിക്കുന്നതായി അഫ്്ഗാന്‍ അധികൃതര്‍ അറിയിച്ചു. യാത്രക്കാര്‍ക്ക് വേണ്ടി തെരച്ചിലും നടക്കുന്നുണ്ട്. ഹെലികോപ്ടറിലുണ്ടായിരുന്ന ഏഴുപേരില്‍ ആറു പേരും പാകിസ്താനികളാണ്. ഒരാള്‍ റഷ്യന്‍ സാങ്കേതിക വിദഗ്്ധനാണ്. പൈലറ്റും പാകിസ്താനിയാണ്.

റഷ്യന്‍ നിര്‍മിത എം.ഐ-17 യാത്രാഹെലികോപ്ടറാണിത്. ഉസ്്‌ബെകിസ്ഥാനിലേക്കുള്ള യാത്രക്കിടെയാണ് അപകടം. അഫ്ഗാന്‍ വ്യോമപാതയില്‍ സഞ്ചരിക്കാന്‍ ഹെലികോപ്ടറിനു അനുമതിയുണ്ടായിരുന്നു. പെഷാവറില്‍ നിന്ന് വടക്ക് പടിഞ്ഞാറന്‍ പാകിസ്താന്‍ വഴിയാണ് ഹെലികോപ്ടറിന്റെ യാത്ര നിശ്ചയിച്ചിരുന്നത്.