തിരൂര്‍: സമസ്തയുടെ  നേതൃത്വത്തിലുള്ള വലിയ പറപ്പൂര്‍ മഹല്ല് ജുമാമസ്ജിദില്‍ സംഘര്‍ഷം. ഇന്നലെ ജുമാ നിസ്‌കാരത്തിനു ശേഷം കാന്തപുരം വിഭാഗം പ്രവര്‍ത്തകരാണ് സംഘര്‍ഷമുണ്ടാക്കിയത്. പള്ളിയിലെ ടാങ്കില്‍ മാലിന്യമിടുകയും നിസ്‌കരിക്കുന്ന സ്ഥലങ്ങളില്‍ ചപ്പുചവറുകളും ചെരുപ്പും വലിച്ചെറിയുകയും ചെയ്തതു ചോദ്യ ചെയ്തവരെ എ.പി വിഭാഗം അക്രമിക്കുകയായിരുന്നു.
പരുക്കേറ്റ പള്ളത്ത് ലത്തീഫ് (35), പടിക്കപ്പറമ്പില്‍ ത്വയ്യിബ് (28) എന്നിവരെ തിരൂര്‍ ജില്ലാ ആശുപത്രിയില്‍ പ്രവേശിപ്പിച്ചു. പള്ളി കമ്മിറ്റി ഭാരവാഹികളായ ടി.പി.നാസര്‍, പള്ളത്ത് മുസ്തഫ എന്നിവരെ അക്രമിക്കുന്നതു തടയാനെത്തിയവര്‍ക്കാണ് പരുക്കേറ്റത്. സംഭവത്തെ തുടര്‍ന്ന്  എ.പി.വിഭാഗം പ്രര്‍ത്തകര്‍ക്കെതിരേ കല്‍പകഞ്ചേരി പൊലിസില്‍ പരാതി നല്‍കി.
സംഘര്‍ഷം തടയാനെത്തിയ തിരുന്നാവായ പഞ്ചായത്ത് യൂത്ത്‌ലീഗ് ജനറല്‍ സെക്രട്ടറി ലത്തീഫ് പള്ളത്തിനെയും പി.പി ത്വയ്യിബിനെയും അക്രമിച്ചവര്‍ക്കെതിരേ എത്രയുംവേഗം നടപടിയെടുക്കണമെന്ന് പഞ്ചായത്ത് യൂത്ത്‌ലീഗ് കമ്മിറ്റി ആവശ്യപ്പെട്ടു. ആസൂത്രിതമായി സംഘര്‍ഷമുണ്ടാക്കി സമസ്തയുടെ പ്രവര്‍ത്തകരെ ആക്രമിച്ചവരെ ഉടന്‍ പിടികൂടണമെന്ന് മുഈനുവില്ലാ സംഘവും ആവശ്യപ്പെട്ടു.