കോഴിക്കോട്:കൂടത്തായി കൊലപാതക കേസിലെ പരാതിക്കാരനായ റോജോയുടെ മൊഴിയെടുക്കല്‍ തുടരുന്നു. വടകര എസ്.പി ഓഫിസില്‍ എസ്.പി കെ.ജി സൈമണിന്റെ നേതൃത്വത്തിലാണ് മൊഴിയെടുക്കുന്നത്. കൂടത്തായിയിലെ മരണങ്ങളില്‍ എപ്പോള്‍ മുതലാണ് സംശയങ്ങള്‍ തോന്നിത്തുടങ്ങിയത് എന്നതുള്‍പ്പെടെയുള്ള കാര്യങ്ങള്‍ റോജോയോട് ചോദിച്ചേക്കും.

റോയിയുടെ സഹോദരനായ റോജോ അന്വേഷണസംഘത്തിന്റെ നിര്‍ദേശപ്രകാരമാണ് അമേരിക്കയില്‍ നിന്ന് നാട്ടിലെത്തിയത്. വ്യാജ ഒസ്യത്തിനെക്കുറിച്ചും സഹോദരന്‍ റോയിയുടെ മരണം സംബന്ധിച്ചും എസ്.പിക്കു പരാതി നല്‍കിയ ശേഷമായിരുന്നു തിരികെ അമേരിക്കയിലേക്കു മടങ്ങിയത്. ഈ പരാതിയില്‍ സ്‌പെഷല്‍ ബ്രാഞ്ചും പിന്നീട് ക്രൈംബ്രാഞ്ചും നടത്തിയ അന്വേഷണത്തിലാണ് കൊലപാതക പരമ്പരയുടെ ചുരുളഴിയുന്നത്.

മുഖ്യപ്രതി ജോളിയെ മറ്റൊരു അന്വേഷണസംഘം ചോദ്യം ചെയ്യുകയാണ്.