സോഫിയ (ബള്‍ഗേറിയ): യൂറോകപ്പ് യോഗ്യതാ മത്സരത്തില്‍ ബള്‍ഗേറിയന്‍ ആരാധകരുടെ വംശീയാധിക്ഷേപത്തിന് ഗോള്‍വര്‍ഷത്തിലൂടെ മറുപടി പറഞ്ഞ് ഇംഗ്ലണ്ട്. ഇന്നലെ നടന്ന മത്സരത്തില്‍ ബള്‍ഗേറിയയെ എതിരില്ലാത്ത ആറു ഗോളുകള്‍ക്കാണ് ഇംഗ്ലീഷ് പട തകര്‍ത്തെറിഞ്ഞത്.
ജയത്തോടെ യൂറോകപ്പ് യോഗ്യതയ്ക്കടുത്തെത്തി ഇംഗ്ലണ്ട്. അടുത്ത മാസം താരതമ്യേന ദുര്‍ബലരായ മോണ്ടിനെഗ്രോയുമായാണ് ടീമിന്റെ അടുത്ത മത്സരം. ഇംഗ്ലണ്ടിനായി റഹീം സ്റ്റെര്‍ലിങ്, റോസ് ബാര്‍ക്ലെ എന്നിവര്‍ ഇരട്ടഗോളുകള്‍ നേടിയപ്പോള്‍ ഹാരി കെയ്‌നും മാര്‍ക്കസ് റാഷ്‌ഫോര്‍ഡും വല കുലുക്കി. ജയത്തോടെ ഇംഗ്ലണ്ട് ഗ്രൂപ്പ് എയില്‍ ഒന്നാം സ്ഥാനത്തെത്തി. ആറ് കളികളില്‍നിന്ന് 15 പോയിന്റാണ് ടീമിനുള്ളത്. ഇത്രയും കളികളില്‍നിന്ന് 12 പോയിന്റുള്ള ചെക് റിപ്പബ്ലിക്കാണ് രണ്ടാമത്. കഴിഞ്ഞ മത്സരത്തില്‍ ചെക്ക് റിപ്പബ്ലിക്കിനോടേറ്റ (2-1) പരാജയത്തില്‍നിന്ന് പാഠമുള്‍ക്കൊണ്ട് ഇറങ്ങിയ ഇംഗ്ലണ്ട് കൂടുതല്‍ കരുത്താര്‍ജിക്കുന്നതാണ് സ്റ്റേഡിയം സാക്ഷ്യം വഹിച്ചത്. പന്തടക്കത്തിലും ഗോള്‍ ഉതിര്‍ക്കുന്നതിലും ബള്‍ഗേറിയയെ കടത്തിവെട്ടിയായിരുന്നു ഇംഗ്ലീഷ് കുതിപ്പ്.
മത്സരത്തിലെ ഏഴാം മിനുട്ടില്‍ തന്നെ റാഷ്‌ഫോര്‍ഡിലൂടെ ഇംഗ്ലണ്ട് മുന്നിലെത്തി. തുടര്‍ന്ന് 20, 32 മിനുട്ടുകളില്‍ ബാര്‍ക്ലെയുടെ ഇരട്ടഗോള്‍ നേട്ടത്തില്‍ ഇംഗ്ലണ്ട് ലീഡ് മൂന്നാക്കി ഉയര്‍ത്തി. പിന്നീട് സ്റ്റെര്‍ലിങ്ങിന്റെ പ്രകടനമായിരുന്നു. ആദ്യ പകുതിയിലെ അധിക സമയത്തും രണ്ടാം പകുതിയിലെ 69ാം മിനുട്ടിലും ഗോള്‍നേടി താരം സ്റ്റേഡിയത്തിലെ ആരാധകരുടെ വായടപ്പിച്ചു.
ഒടുവില്‍ 85ാം മിനുട്ടില്‍ നായകന്‍ ഹാരി കെയ്ന്‍ കൂടി ഗോള്‍ സ്വന്തമാക്കിയതോടെ ഇംഗ്ലണ്ട് ആറാടി സ്റ്റേഡിയം വിട്ടു.