ദുബൈ: ആജീവനാന്ത വിസ വിവാദത്തില്‍ മാപ്പ് പറഞ്ഞ് ദുബൈ ആസ്ഥാനമായി പ്രവര്‍ത്തിക്കുന്ന റയാദ് ഗ്രൂപ്പ്. ഗോള്‍ഡന്‍ വിസയെ സംബന്ധിച്ച വാര്‍ത്തയുടെ ഉത്തരവാദിത്തവും കമ്പനി ഏറ്റെടുത്തു. ഗോള്‍ഡന്‍ വിസ സംബന്ധിച്ച മാര്‍ഗനിര്‍ദേശം നല്‍കുകയായിരുന്നു ലക്ഷ്യമെന്നും ഇത് സംബന്ധിച്ചുണ്ടായ ആശയകുഴപ്പങ്ങളുടെ ഉത്തരവാദിത്തം ഏറ്റെടുക്കുന്നതായും കമ്പനി വ്യക്തമാക്കി.

ALSO READ: ഷാര്‍ജയില്‍ ഒന്നരവയസുകാരിയായ മകളെ കൊന്ന് മലയാളി യുവതി ആത്മഹത്യ ചെയ്തു

ഒരു ലക്ഷം ദിര്‍ഹം ഫീസ് നല്‍കിയാല്‍ 'ആജീവനാന്ത ഗോള്‍ഡന്‍ വിസ' ലഭിക്കുമെന്നും ഇന്ത്യക്കാര്‍ക്കും ബംഗ്ലദേശികള്‍ക്കും യുഎഇയില്‍ വരാതെ തന്നെ അപേക്ഷിക്കാമെന്നും നേരത്തേ റയാദ് ഗ്രൂപ്പ്  അവകാശപ്പെട്ടിരുന്നു. എന്നാല്‍ ഇക്കാര്യങ്ങള്‍ യുഎഇ അധികൃതര്‍ തള്ളിയിരുന്നു. ഇതിനെതുടര്‍ന്നാണ് കമ്പനി ക്ഷമാപണവും വിശദീകരണവുമായി രംഗത്തെത്തിയത്. ഫെഡറല്‍ അതോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്, കസ്റ്റംസ് ആന്‍ഡ് പോര്‍ട്ട് സെക്യൂരിറ്റി (ഐസിപി) ഇതിനെതിരെ രംഗത്തെത്തിയിരുന്നു. 

വിസ നടപടികള്‍ പൂര്‍ണമായും യുഎഇ സര്‍ക്കാരിന്റെ അധികാരപരിധിയിലാണെന്നും, യോഗ്യരായ വ്യക്തികള്‍ക്ക് ഗോള്‍ഡന്‍ വിസയ്ക്ക് അപേക്ഷിക്കാന്‍ മാര്‍ഗനിര്‍ദേശം നല്‍കാനുള്ള സാധ്യത മാത്രമാണ് തങ്ങള്‍ പരിശോധിച്ചതെന്നും ഗ്രൂപ്പ് വ്യക്തമാക്കി. നിയമപരമായ മാര്‍ഗങ്ങളിലൂടെ മാത്രം അപേക്ഷകള്‍ സ്വീകരിക്കാനാണ് ഉദ്ദേശിച്ചതെന്നും, വിസ നല്‍കാനുള്ള അധികാരം സര്‍ക്കാരിന് മാത്രമാണെന്നും കമ്പനി അറിയിച്ചു.

ALSO READ: Etihad Rail: യാഥാര്‍ഥ്യമാകുന്നത് യുഎഇയുടെ നീണ്ട സ്വപ്‌നം, ട്രെയിനുകള്‍ അടുത്തവര്‍ഷം ഓടിത്തുടങ്ങും; റൂട്ട്, സ്റ്റേഷനുകള്‍, ഫീച്ചറുകള്‍ അറിയാം

ആശയക്കുഴപ്പത്തിന് കാരണമായതില്‍ റയാദ് ഗ്രൂപ്പ് ക്ഷമാപണം നടത്തി. ഭാവിയില്‍ യുഎഇ നിയന്ത്രണങ്ങള്‍ക്ക് അനുസൃതമായി കൃത്യവും വ്യക്തവുമായ വിവരങ്ങള്‍ മാത്രം പങ്കുവയ്ക്കുമെന്നും, ഗോള്‍ഡന്‍ വിസയുമായി ബന്ധപ്പെട്ട ഉപദേശക സേവനങ്ങള്‍ നിര്‍ത്തലാക്കുന്നതായും ഗ്രൂപ്പ് പ്രഖ്യാപിച്ചു.

Misleading information about UAE Golden Visa eligibility spread online, causing confusion among expatriates. Riyadh Group admits responsibility, prompting authorities to warn against spreading false claims.