ചങ്ങനാശ്ശേരി: സിംഗിള്‍ ഡ്യൂട്ടി സംവിധാനത്തിന്റെ പേരില്‍ വര്‍ഷങ്ങള്‍ പഴക്കമുള്ള ചങ്ങനാശ്ശേരി പൊന്‍കുന്നം സര്‍വിസ് കെ.എസ്.ആര്‍.ടി.സി നിര്‍ത്തലാക്കിയത് യാത്രക്കാരെ വലക്കുന്നു.
കച്ചവടസ്ഥാപനങ്ങളില്‍ ജോലി ചെയ്യുന്നവരും മറ്റു മേഖലകളില്‍ പോയി രാത്രിയില്‍ മടങ്ങി വരുന്നവരുമായ യാത്രക്കാരെയാണ് ഇതു ഏറെ ബാധിച്ചിരിക്കുന്നത്. രാത്രി 10.10നു ചങ്ങനാശ്ശേരിയില്‍ നിന്നും ആരംഭിച്ചു 11.15നു പൊന്‍കുന്നത്തെത്തുന്ന സര്‍വിസായിരുന്നു നിര്‍ത്തലാക്കിയതില്‍ പ്രധാനം. തെങ്ങണാ, കറുകച്ചാല്‍, 14ാം മൈല്‍ തുടങ്ങിയ പ്രദേശങ്ങളിലുള്ളവര്‍ക്കു ഏറെ സഹായകമായ സര്‍വിസ് കൂടിയായിരുന്നു ഇത്.
പൊന്‍കുന്നത്തു നിന്നും പുലര്‍ച്ചെ 5.40നു ചങ്ങനാശ്ശേരി വഴി ചമ്പക്കുളത്തേക്കും ഈ ബസാണ് സര്‍വിസ് നടത്തിയിരുന്നത്.
പുലര്‍ച്ചെ യാത്ര ചെയ്യേണ്ടി വരുന്നവര്‍ക്കും ഇതു നിര്‍ത്തല്‍ ചെയ്തത് ഏറെ ബാധിച്ചിട്ടുണ്ട്. ഇതുകൂടാതെ സിംഗിള്‍ ഡ്യൂട്ടിയുടെ മറവില്‍ രാവിലെ 6.15നുള്ള കാവാലം, 8.30നുള്ള മുണ്ടക്കയം, വൈകിട്ട് 4.30നുള്ള മുണ്ടക്കയം, വൈകിട്ട് അഞ്ചിനുള്ള മണിമല സര്‍വിസുകളും നിര്‍ത്തലാക്കി. കൂടാതെ ചങ്ങനാശ്ശേരി ഡിപ്പോയുടെ കീഴിലുള്ള പെരുന്ന, കറുകച്ചാല്‍, സ്വകാര്യ ബസ് സ്റ്റാന്റുകളിലെ കെ.എസ്.ആര്‍.ടി.സി അന്വേഷണ കൗണ്ടറുകളും നിര്‍ത്തലാക്കിയവയില്‍പ്പെടും.