ന്യൂഡല്‍ഹി:ശബരിമലയില്‍ എല്ലാ പ്രായത്തിലുമുള്ള സ്ത്രീകളെ പ്രവേശിപ്പിക്കണമെന്ന  വിധിക്ക് സുപ്രിംകോടതി സ്റ്റേ ഇല്ല.

അതേസമയം, വിധിക്കെതിരെ സമര്‍പ്പിച്ച പുന:പരിശോധനാ ഹരജികള്‍ ജനുവരി 22 ന് തുറന്ന കോടതിയില്‍ കേള്‍ക്കും. റിട്ട് ഹരജികളും ഒപ്പം പരിഗണിക്കും. എല്ലാ കക്ഷികൾക്കും സർക്കാരിനും നോട്ടീസ് അയക്കാനും തീരുമാനിച്ചു.

ചീഫ് ജസ്റ്റിസ് രഞ്ജന്‍ ഗോഗോയ്, ജസ്റ്റിസുമാരായ എം.എം ഖന്‍വില്‍കര്‍, റോഹിങ്ടണ്‍ നരിമാന്‍, ഡി.വൈ ചന്ദ്രചൂഢ്, ഇന്ദു മല്‍ഹോത്ര എന്നിവരാണ് ഹരജികള്‍ പരിഗണിച്ചത്.

ശബരിമല യുവതീപ്രവേശന വിധി പുന:പരിശോധിക്കണമെന്നാവശ്യപ്പെട്ടുകൊണ്ടുള്ള 50 ഹരജികളാണ് സുപ്രിംകോടതിയിലെത്തിയത്.

മുന്‍ ചീഫ് ജസ്റ്റിസ് ദീപക് മിശ്രയുടെ നേതൃത്വത്തിലുള്ള അഞ്ചംഗ ഭരണഘടനാ ബെഞ്ചാണ് കേസില്‍ വിധി പറഞ്ഞത്. വിധി പറഞ്ഞ ബെഞ്ചിലുള്ള മൂന്ന് ജഡ്ജിമാര്‍ പുനഃപരിശോധനാ ഹരജികള്‍ പരിഗണിക്കുന്ന ബെഞ്ചിലുമുണ്ടായിരുന്നു.

രാവിലെ റിട്ട് ഹരജികള്‍ പരിഗണിച്ച ബെഞ്ച് പുനഃപരിശോധനാ ഹരജികള്‍ തുറന്ന കോടതിയില്‍ വാദം കേള്‍ക്കണമെന്ന ശബരിമല അവകാശ സംരക്ഷണ ഫോറത്തിന്റെ ആവശ്യം തള്ളിയിരുന്നു.