കറാച്ചി: ടീമിന്റെ തുടര്‍ച്ചയായ തോല്‍വികള്‍ക്ക് പരിഹാരം കാണുന്നതിന് പാകിസ്താന്‍ ക്രിക്കറ്റ് ക്യാപ്റ്റനായിരുന്ന സര്‍ഫറസ് അഹ്മദിനെ പുറത്താക്കി. ടീമിന്റെ ടി20, ടെസ്റ്റ് ക്യാപ്റ്റന്‍സിയില്‍ നിന്നാണ് വിക്കറ്റ് കീപ്പര്‍ സര്‍ഫറസ് അഹ്മദിനെ നീക്കിയത്. നായകസ്ഥാനം മാത്രമല്ല ടീമിലെ സ്ഥാനവും സര്‍ഫറസിനു നഷ്ടമായി. ശ്രീലങ്കക്കെതിരേയുള്ള പരമ്പരയില്‍ പാകിസ്താന്‍ തോറ്റിരുന്നു. ഇതിനെ തുടര്‍ന്നാണ് സര്‍ഫറസിന്റെ ക്യാപ്റ്റന്‍സ് നഷ്ടമായത്. ലോകകപ്പിലും പാകിസ്താന്‍ മോശം പ്രകടനമായിരുന്നു പുറത്തെടുത്തത്. അന്നും സര്‍ഫറസിനായിരുന്നു പഴി കേട്ടത്. 

ആസ്‌ത്രേലിയന്‍ പര്യടനത്തിനുള്ള ടീമില്‍ നിന്നാണ് സര്‍ഫറസിനെ ഒഴിവാക്കിയിട്ടുള്ളത്. സര്‍ഫറസിന് പകരം ടി20 ടീമിന്റെ നായകനായി യുവ ബാറ്റ്‌സ്മാന്‍ ബാബര്‍ അസമിനെയും ടെസ്റ്റ് ടീം ക്യാപ്റ്റനായി അസ്ഹര്‍ അലിയെയും നിയമിച്ചു.

അടുത്ത വര്‍ഷം നടക്കുന്ന ടി20 ലോകകപ്പ് മുന്നില്‍ കണ്ട@ാണ് ബാബറിന് ക്യാപ്റ്റന്‍സി നല്‍കിയിരിക്കുന്നത്. ടി20 ലോകകപ്പ് വരെയുള്ള മത്സരങ്ങളിലെല്ലാം ടീമിനെ നയിക്കുക അദ്ദേഹമായിരിക്കും. എന്നാല്‍ ഈ സീസണിലെ ടെസ്റ്റുകളിലാണ് അസ്ഹറിന് നായകന്റെ ചുമതല നല്‍കിയിരിക്കുന്നത്. 

2017ലാണ് സര്‍ഫറസ് അഹ്മദ് പാകിസ്താന്‍ ക്രിക്കറ്റ് ടീമിന്റെ ക്യാപ്റ്റന്‍ ആവുന്നത്. സര്‍ഫറസിന് കീഴില്‍ 13 ടെസ്റ്റുകള്‍ കളിച്ച പാകിസ്താന്‍ എട്ടെണ്ണം തോല്‍ക്കുകയും നാലെണ്ണം ജയിക്കുകയും ഒന്ന് സമനിലയില്‍ അവസാനിക്കുകയും ചെയ്തിരുന്നു.

സര്‍ഫറസ് അഹ്മദിന് കീഴിലാണ് 2017ല്‍ പാകിസ്താന്‍ ചാംപ്യന്‍സ് ലീഗ് കിരീടം നേടിയതും ഐ.സി.സി ടി20 റാങ്കിങ്ങില്‍ ഒന്നാം സ്ഥാനത്തെത്തിയതും.