മലപ്പുറം: ജില്ലയില്‍ ഈ വര്‍ഷം ഇതുവരെ 40 മലമ്പനി കേസുകള്‍ റിപ്പോര്‍ട്ട് ചെയ്ത സാഹചര്യത്തില്‍ പ്രതിരോധ പ്രവര്‍ത്തനങ്ങള്‍ ശക്തമാക്കിയതായി ഡി.എം.ഒ ഡോ. കെ. സക്കീന വാര്‍ത്താസമ്മേളനത്തില്‍ അറിയിച്ചു. മലമ്പനി മാസാചരണ ഭാഗമായാണ് ഇതരസംസ്ഥാന തൊഴിലാളികളിലെ രോഗബാധിതരെ കണ്ടെത്തുന്നതടക്കമുള്ള പ്രവര്‍ത്തനം ശക്തമാക്കുന്നത്.
തദ്ദേശീയരായ രണ്ടു പേര്‍ക്കും രോഗബാധ കണ്ടെത്തിയതോടെ ജില്ലയില്‍ കൊതുകു വളരാനിടയുള്ള സ്ഥലങ്ങളില്‍ നശീകരണ പ്രവര്‍ത്തനം നടത്തും. നിലമ്പൂര്‍, ആനക്കയം എന്നിവിടങ്ങളിലാണ് നാട്ടുകാരായവരില്‍ രോഗബാധ കണ്ടെത്തിയത്. 2012മുതല്‍ 16 വരെ യഥാക്രമം 232,185, 230, 156, 170 മലമ്പനി കേസുകള്‍ ജില്ലയില്‍ റിപ്പോര്‍ട്ട് ചെയ്തിരുന്നു. ഇതരസംസ്ഥാന തൊഴിലാളികള്‍ ഏറെയുള്ള ജില്ലയില്‍ ഇവരുടെ വാസസ്ഥലം കേന്ദ്രീകരിച്ചുള്ള സ്‌ക്രീനിങ് പരിശോധനകള്‍ ആരോഗ്യവകുപ്പ് തുടങ്ങിയിട്ടുണ്ട്.
15 കേന്ദ്രങ്ങളില്‍ ഇത്തരത്തില്‍ രക്തസാമ്പിള്‍ ശേഖരിച്ചു പരിശോധന നടത്തി രോഗലക്ഷണമുള്ളവരെ അടുത്ത സര്‍ക്കാര്‍ ആശുപത്രിയിലേക്കു ചികിത്സയ്ക്കയക്കും. ഈ വര്‍ഷം റിപ്പോര്‍ട്ട് ചെയ്യപ്പെട്ട കേസുകളില്‍ ഏറെയും ഇതരസംസ്ഥാന തൊഴിലാളികളിലാണ്. ജില്ലയിലെ നഗരപ്രദേശങ്ങളില്‍ മലമ്പനി പരത്തുന്ന കൊതുകുകളുടെ സാന്നിധ്യം കണ്ടെത്തിയിട്ടുണ്ട്. കെട്ടിടത്തിനു മുകളിലെ തുറന്ന ജലസംഭരണികള്‍, ആഴംകുറഞ്ഞ കിണറുകള്‍, റബര്‍ തോട്ടങ്ങളിലെ ചിരട്ടകള്‍, പുല്‍ക്കാടുകള്‍ എന്നിവിടങ്ങളിലാണ് കൊതുകുകള്‍ മുട്ടിയിട്ടു വിരിയുന്നത്. ഇവ നശിപ്പിക്കാന്‍ പൊതുജനവും തദ്ദേശ സ്ഥാപനങ്ങങ്ങളും മുന്നിട്ടിറങ്ങണമെന്നും ഡി.എം.ഒ അഭ്യര്‍ഥിച്ചു.
ജില്ലയിലെ രോഗബാധ സാധ്യതയുള്ള പ്രദേശങ്ങളില്‍ മുന്നറിയിപ്പ് കൂടാതെ പരിശോധന നടത്തി കര്‍ശന നടപടികള്‍ സ്വീകരിക്കും. പിഴയീടാക്കുന്നതും ഇതിന്റെ ഭാഗമാണ്. മലമ്പനി പരത്തുന്ന അനോഫിലിസ് വിഭാഗത്തിലെ പെണ്‍കൊതുകുകളുടെ കടിയേറ്റാല്‍ 12 മുതല്‍ 21 ദിവസത്തിനകം രോഗലക്ഷണം പ്രകടമാകും. ഇടവിട്ടുള്ള പനി, വിയര്‍പ്പ്, വിറയല്‍, തണുപ്പ് അനുഭവപ്പെടുക എന്നിവയാണ് ലക്ഷണം. രോഗം സ്ഥിരീകരിച്ചാല്‍ രണ്ടാഴ്ചത്തെ ചികിത്സകൊണ്ടു പൂര്‍ണമായും ഭേദമാക്കാന്‍ കഴിയും. ഇതിനാവശ്യമായ മരുന്ന് ആരോഗ്യവകുപ്പിന്റെ ആശുപത്രികളില്‍ ലഭ്യമാണ്. എന്നാല്‍, സ്വയം ചികിത്സ നടത്തുന്നതു മരണകാരണംവരെയാകാം. വാര്‍ത്താസമ്മേളനത്തില്‍ ഡോ. മുഹമ്മദ് ഇസ്മാഈല്‍, ബി.എസ് അനില്‍കുമാര്‍, ടി.എം ഗോപാലന്‍, ഭാസ്‌കരന്‍ തൊടുമണ്ണില്‍ എന്നിവര്‍ പങ്കെടുത്തു.