തിരുവനന്തപുരം: നഗരത്തിന്റെ മാസ്റ്റര്‍ പ്ലാന്‍ തയാറാക്കുന്നതിനൊപ്പം വിശദ നഗരാസൂത്രണ പദ്ധതി (ഡീറ്റൈല്‍ഡ് ടൗണ്‍ പ്ലാനിങ് സ്‌കീം) കൂടി പുതുക്കുന്നതിന് നഗരസഭാ കൗണ്‍സിലിന്റെ അംഗീകാരം. പുതിയ മാസ്റ്റര്‍പ്ലാന്‍ നിലവില്‍ വരുമ്പോള്‍ അതിനനുസൃതമായി വിശദ നഗരാസൂത്രണ പദ്ധതി കൂടെ പുതുക്കിയില്ലെങ്കില്‍ ജനങ്ങള്‍ക്കുണ്ടാകുന്ന ബുദ്ധിമുട്ടുകള്‍ ഒഴിവാക്കുന്നതിനാണ് നടപടി. നഗരത്തിന്റെ പ്രധാന ഭാഗങ്ങളില്‍ വിശദ നഗരാസൂത്രണ പദ്ധതി നിലനില്‍ക്കുന്നുണ്ട്. ഇവിടങ്ങളില്‍ നിര്‍മാണ പ്രവര്‍ത്തനങ്ങള്‍ അനുവദിക്കുന്നത് ഈ പദ്ധതിയുടെ മാനദണ്ഡങ്ങള്‍ കൂടി പരിഗണിച്ചാണ്. പഴയ മാസ്റ്റര്‍ പ്ലാന്‍ അസാധുവായതിനാല്‍ പഴയ നഗരാസൂത്രണ പദ്ധതിയും ഭേദഗതി ചെയ്ത് പുതുക്കണമെന്നാവശ്യപ്പെട്ട് റീജ്യനല്‍ ടൗണ്‍പ്ലാനര്‍ക്ക് നഗരാസൂത്രണ സ്റ്റാന്‍ഡിങ് കമ്മിറ്റി കത്ത് നല്‍കി. സര്‍ക്കാരിനോടും ചീഫ് ടൗണ്‍പ്ലാനറോടും ഇക്കാര്യം ആവശ്യപ്പെടാനും ഇന്നലെ ചേര്‍ന്ന കൗണ്‍സില്‍ യോഗം അംഗീകാരം നല്‍കി. മാസ്റ്റര്‍ പ്ലാന്‍ പൂര്‍ത്തീകരിക്കുന്നതിനുള്ള പ്രവര്‍ത്തനങ്ങള്‍ വേഗത്തില്‍ പുരോഗമിക്കുകയാണ്. 18 പ്രത്യേക വര്‍ക്കിങ് ഗ്രൂപ്പുകള്‍ രൂപീകരിച്ചാണ് പ്രവര്‍ത്തനം. വര്‍ക്കിങ് ഗ്രൂപ്പുകള്‍ ശക്തിപ്പെടുത്തുന്നതിന് കൂടുതല്‍ ആളുകെളെ ഉള്‍പ്പെടുത്തി ഭേദഗതി ചെയ്യാനും കൗണ്‍സില്‍ അംഗീകാരം നല്‍കി.