ഉപ്പള: സ്‌കൂട്ടറില്‍ കാറിടിച്ച് യുവാവിനെ വധിക്കാന്‍ ശ്രമിച്ചതായി പരാതി.സംഭവത്തില്‍ പരുക്കേറ്റ മിയാപദവ് ബെജങ്കള്ളയിലെ മൊയിതീന്‍ കുഞ്ഞി (25)യെ ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസമാണ് സംഭവം.
കഴിഞ്ഞ ദിവസം വൈകുന്നേരം ആറോടെ തന്നെ ഒരാള്‍ ഫോണ്‍ വിളിച്ച് മീയാപദവ് ഗ്രൗണ്ടിലേക്ക് വരാന്‍ ആവശ്യപ്പെട്ടു.
ഇതേ തുടര്‍ന്ന് ഗ്രൗണ്ടിലെത്തി തന്നെ കാറിലുണ്ടായിരുന്ന അഞ്ചംഗ സംഘം മര്‍ദിക്കുകയും ഇതിനിടയില്‍ സംഘത്തിന്റെ പിടിയില്‍ നിന്നും രക്ഷപ്പെട്ട് ഓടുകയുമായിരുന്നുവെന്നുമാണ് മൊയ്തീന്‍കുഞ്ഞിയുടെ പരാതി. എന്നാല്‍ താന്‍ സ്‌കൂട്ടര്‍ വച്ച സ്ഥലത്തെത്തിയപ്പോള്‍ അവിടെ സ്‌കൂട്ടര്‍ കാണാനില്ലായിരുന്നു. തുടര്‍ന്ന് നാട്ടുകാരുടെ സഹായത്തോടെ അന്വേഷണം നടത്തിയപ്പോള്‍ സമീപത്തെ കുറ്റിക്കാട്ടില്‍ നിന്നും സ്‌കൂട്ടര്‍ കണ്ടെത്തി. എന്നാല്‍ സ്‌കൂട്ടര്‍ എടുത്ത് വീട്ടിലേക്ക് പോകുന്നതിനിടെ കാറിലെത്തിയ സംഘം സ്‌കൂട്ടര്‍ ഇടിച്ചുവീഴ്ത്തിയ ശേഷം വാളെടുത്ത് വധിക്കാന്‍ ശ്രമിക്കുകയായിരുന്നു. തുടര്‍ന്ന് നിന്നും ഓടി രക്ഷപ്പെടുകയായിരുന്നുവെന്നും മൊയ്തീന്‍കുഞ്ഞി പറഞ്ഞു.
അതേ സമയം മൊയ്തീനെ വധിക്കാന്‍ ശ്രമിച്ച സംഘത്തിന്റേതെന്ന് സംശയിക്കുന്ന ഒരു കാര്‍ രാത്രി 10 ഓടെ ഒരു സംഘം തല്ലി തകര്‍ത്തിട്ടുണ്ട്.
കഞ്ചാവ് വില്‍പ്പനയുമായി ബന്ധപ്പെട്ടുള്ള പ്രശ്‌നത്തിന്റെ മറവില്‍ ഇരുവിഭാഗങ്ങള്‍ തമ്മില്‍ ചേരിതിരിഞ്ഞ് സംഘര്‍ഷാവസ്ഥ ഉണ്ടാക്കുന്നതായാണ് നാട്ടുകാരുടെ പരാതി.