മലപ്പുറം: ഡല്‍ഹിയിലെ അംബേദ്കര്‍ സ്‌റ്റേഡിയത്തില്‍ നടന്ന സുബ്രതോകപ്പ് ഫുട്‌ബോള്‍ സെമിഫൈനലില്‍ അഫ്ഗാനിസ്താനെതിരേ കേരളത്തിന് തോല്‍വി. കടുത്ത പ്രതിരോധമാണ് കേരള ടീം കാഴ്ച്ചവച്ചത്. ആദ്യ പകുതിയില്‍ രണ്ടു ടീമുകള്‍ക്കും ഗോളവസരങ്ങള്‍ ലഭിച്ചെങ്കിലും ലക്ഷ്യത്തിലെത്തിക്കാനായില്ല. ആദ്യ രണ്ടു പകുതികളും അവസാനിച്ചപ്പോള്‍ ടീമുകള്‍ ഗോള്‍രഹിത സമനില പാലിച്ചതിനാല്‍ കളി അധികസമയത്തേക്ക് നീങ്ങുകയായിരുന്നു. അധിക സമയത്തിന്റെ രണ്ടാം പകുതിയുടെ അവസാന മിനുട്ടിലാണ് കേരളത്തെ ഞെട്ടിച്ച് അഫ്ഗാന്‍ ടീമിന്റെ ഗോള്‍ പിറന്നത്. കളി തീരാന്‍ രണ്ടു മിനിട്ടു മാത്രം ബാക്കി നില്‍ക്കേ അഫ്ഗാന്‍ താരം ഷബീറാണ് വിജയഗോള്‍ നേടിയത്.
ലീഗ് റൗണ്ടിലും ക്വാര്‍ട്ടറിലും ഒരു ഗോള്‍ പോലും വഴങ്ങാതെയാണ് കേരള ടീം സെമിഫൈനലിലെത്തിയിരുന്നത്.