കണ്ണൂര്‍: ഉത്തരമലബാറിന്റെ സമഗ്ര വികസനം ലക്ഷ്യമിട്ട് നോര്‍ത്ത് മലാബര്‍ ചേംബര്‍ ഓഫ് കൊമേഴ്‌സ് ഇന്നു കൊച്ചിയില്‍ സംരംഭകത്വ സദസ് സംഘടിപ്പിക്കും. ഇടപ്പള്ളി മാരിയറ്റ് ഹോട്ടലില്‍ വ്യവസായ പ്രമുഖരെ പങ്കെടുപ്പിച്ച് നടത്തുന്ന സംരംഭകത്വ സദസ് രാവിലെ 10ന് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. മന്ത്രിമാരായ ഇ.പി ജയരാജന്‍, കടന്നപ്പള്ളി രാമചന്ദ്രന്‍, ഇ ചന്ദ്രശേഖരന്‍, എ.സി മൊയ്തീന്‍, വ്യവസായികളായ എം.എ യൂസഫലി, ഡോ. ആസാദ് മൂപ്പന്‍, പി.എന്‍.സി മേനോന്‍, ഡോ. ഷംഷീര്‍ വയലില്‍ പങ്കെടുക്കും. രാജ്യത്തും പുറത്തുമുള്ള 200 പേര്‍ പങ്കെടുക്കും. കണ്ണൂര്‍ വിമാനത്താവളം, അഴീക്കല്‍ തുറമുഖം തുടങ്ങിയ പദ്ധതികളുടെ പ്രവൃത്തി പുരോഗമിക്കുന്നതിന്റെ ഭാഗമായാണു വ്യവസായ മേഖലയിലെ പ്രമുഖരെ ഉള്‍ക്കൊള്ളിച്ച് പരിപാടി സംഘടിപ്പിക്കുന്നത്. ആരോഗ്യ, ടൂറിസം മേഖലകളിലാണു കൂടുതല്‍ നിക്ഷേപം പ്രതീക്ഷിക്കുന്നത്. കെ.എസ്.ഐ.ഡി.സിയുടെയും കിന്‍ഫ്രയുടെയും കീഴിലുള്ള ജില്ലയിലെ 700 ഏക്കര്‍ ഭൂമിയില്‍ സംരംഭം തുടങ്ങാനുള്ള അനുകൂല ഘടകങ്ങളും നിക്ഷേപകരെ അറിയിക്കും. നിലവിലെ 400 കോടി രൂപയുടെ കൈത്തറി കയറ്റുമതി വര്‍ധിപ്പിക്കുകയും ബേക്കലിനെയും കുടകിനെയും ബന്ധിപ്പിച്ച് ടൂറിസം സര്‍ക്യൂട്ട് സ്ഥാപിക്കുകയും ലക്ഷ്യമിടുന്നു.