ശ്രീനഗര്‍: ശ്രീനഗറില്‍ പൊലിസുകാരനെ ജനക്കൂട്ടം തല്ലിക്കൊന്ന സംഭവത്തില്‍ എസ്.പിക്ക് സ്ഥലം മാറ്റം. എസ്.പി സജ്ജാദ് ഖാലിദിനെയാണ് സ്ഥലം മാറ്റിയത്. അസിസ്റ്റന്റ് എസ്.പി സജ്ജാദ് ഷാ പകരം ചുമതലയേല്‍ക്കും.

കഴിഞ്ഞ ദിവസമാണ് ജമ്മു കശ്മിര്‍ തലസ്ഥാനമായ ശ്രീനഗറില്‍ പള്ളിക്കു പുറത്ത് മുതിര്‍ന്ന പൊലിസ് ഉദ്യോഗസ്ഥനെ നാട്ടുകാര്‍ അടിച്ചുകൊന്നത്. ശ്രീനഗറിലെ നൗഹട്ട ബട്ടാ ചൗക്ക് ജാമിഅ മസ്ജിദിനു പരിസരത്തായിരുന്നു സംഭവം.

ജമ്മു കശ്മിര്‍ പൊലിസില്‍ ഡെപ്യൂട്ടി പൊലിസ് സൂപ്രണ്ടായ മുഹമ്മദ് അയ്യൂബ് പണ്ഡിറ്റ് ആണ് കൊല്ലപ്പെട്ടത്. പള്ളിയില്‍ നിസ്‌കാരത്തിനായി എത്തിയ വിശ്വാസികളെ പരിശോധിക്കുന്നതിനിടെയുണ്ടായ വാക്കുതര്‍ക്കമാണ് ഉദ്യോഗസ്ഥന്റെ കൊലപാതകത്തിലേക്ക് നയിച്ചത്. ഈ സമയത്ത് സര്‍വിസ് നിയന്ത്രണത്തിന്റെ ഭാഗമായി അയ്യൂബ് യൂനിഫോം ധരിച്ചിരുന്നില്ല.