തിരുവനന്തപുരം: ചാന്‍സലറായ ഗവര്‍ണറുടെ അനുമതി വാങ്ങാതെ മാര്‍ക്ക് ദാനം റദ്ദാക്കാനുള്ള എം.ജി.സര്‍വകലാശാലാ സിന്‍ഡിക്കേറ്റിന്റെ തീരുമാനം കള്ളക്കളിയും തട്ടിപ്പുമാണെന്ന് ചൂണ്ടിക്കാട്ടി പ്രതിപക്ഷ നേതാവ് രമേശ് ചെന്നിത്തല ഗവര്‍ണര്‍ക്ക് വീണ്ടും കത്ത് നല്‍കി.
എം.ജി.സര്‍വകലാശാലാ നിയമമനുസരിച്ച് സര്‍വകലാശാല നല്‍കിയ ഡിഗ്രിയും ഡിപ്ലമോയും പിന്‍വലിക്കുന്നതിന് ചാന്‍സലറായ ഗവര്‍ണറുടെ അനുമതി വാങ്ങണം. ഇവിടെ അത് ചെയ്യാതെയാണ് മാര്‍ക്ക് ദാനം വഴി നല്‍കിയ ബിരുദങ്ങള്‍ പിന്‍വലിക്കാന്‍ സിന്‍ഡിക്കേറ്റ് തീരുമാനിച്ചത്. ഗവര്‍ണറുടെ അനുമതി വാങ്ങാതെ വിവാദ ബിരുദങ്ങള്‍ റദ്ദാക്കാനെടുത്ത തീരുമാനം വളഞ്ഞ വഴിയിലൂടെ കോടതിയിലെത്തിച്ച് അവയ്ക്ക് പിന്നീട് അംഗീകാരം നേടിക്കൊടുക്കുന്നതിനാണെന്ന് സംശയിക്കണം. ഗവര്‍ണര്‍ ഇക്കാര്യത്തില്‍ സിന്‍ഡിക്കേറ്റ് എടുത്ത എല്ലാ തീരുമാനങ്ങളും റദ്ദാക്കണമെന്നും സ്വതന്ത്രമായ അന്വേഷണം നടത്തണമെന്നും രമേശ് ചെന്നിത്തല കത്തില്‍ അഭ്യര്‍ഥിച്ചു.