ടെല്‍ അവീവ്: ഇസ്‌റാഈലില്‍ ഇടക്കാല തെരഞ്ഞെടുപ്പ് ഒഴിവാക്കണമെന്നും സര്‍ക്കാരിന്റെ കാലാവധി പൂര്‍ത്തീകരിക്കണമെന്നും പ്രധാനമന്ത്രി ബെന്‍യാമിന്‍ നെതന്യാഹു. തെരഞ്ഞെടുപ്പ് ഇസ്‌റാഈലിനെ അപകടത്തിലേക്കു നയിക്കുമെന്നു കാബിനറ്റ് യോഗത്തില്‍ സംസാരിക്കവേ അദ്ദേഹം പറഞ്ഞു.
പ്രതിരോധ മന്ത്രി അവിദ്‌ഗോര്‍ ലൈബര്‍മാന്‍ രാജിവച്ചതോടെയാണ് ഇടക്കാല തെരഞ്ഞെടുപ്പിനുള്ള ആവശ്യം സഖ്യകക്ഷികള്‍ ഉന്നയിച്ചത്. ലൈബര്‍മാന്റെ പാര്‍ട്ടിയായ ഇസ്‌റാഈല്‍ ബൈത്തിനി നെതന്യാഹുവിന്റെ മന്ത്രിസഭയ്ക്കുള്ള പിന്തുണ പിന്‍വലിച്ചിരുന്നു.
പാര്‍ലമെന്റില്‍ ഒരു സീറ്റിന്റെ ഭൂരിപക്ഷം മാത്രമുണ്ടായിരിക്കേയാണ് അവര്‍ പിന്തുണ പിന്‍വലിച്ചിരിക്കുന്നത്. ഇതോടെ സര്‍ക്കാരിന്റെ നിലനില്‍പ്പ് ഭീഷണിയിലായിരിക്കെ മറ്റു പാര്‍ട്ടികളുടെ പിന്തുണ തേടാനായി നെതന്യാഹു ചര്‍ച്ച ആരംഭിച്ചിട്ടുണ്ട്
മന്ത്രിസഭയില്‍നിന്നു പിന്‍വാങ്ങുമെന്നു ഭീഷണി മുഴക്കിയ ഹബായിത്ത് ഹയൂദി പാര്‍ട്ടിയുമായി ചര്‍ച്ച നടത്തിയെങ്കിലും തീരുമാനത്തിലെത്താന്‍ സാധിച്ചിട്ടില്ല. പ്രതിരോധ മന്ത്രി സ്ഥാനം നല്‍കിയില്ലെങ്കില്‍ മന്ത്രിസഭയ്ക്കുള്ള പിന്തുണ പിന്‍വലിക്കുമെന്ന് ഹബായിത്ത് ഹയൂദി നേതാവ് നഫ്താലി ബെന്നിറ്റ് മുന്നറിയിപ്പ് നല്‍കിയിരുന്നു.
ഗസ്സയില്‍ വെടിനിര്‍ത്തല്‍ അംഗീകരിച്ചതിനെ തുടര്‍ന്നാണ് പ്രതിരോധ മന്ത്രി രാജിവച്ചത്. ഫലസ്തീനു മുന്നില്‍ സര്‍ക്കാര്‍ കീഴടങ്ങിയെന്ന് ആരോപിച്ചായിരുന്നു രാജി.