ശ്രീനഗര്‍: കശ്മിരില്‍ സി.ആര്‍.പി.എഫ് ജവാന്‍മാര്‍ സഞ്ചരിച്ച വാഹനത്തിനു നേരെ ഭീകരാക്രമണം. ശ്രീനഗര്‍-ജമ്മു ദേശീയ പാതയില്‍ പന്തചൗക്കിന് സമീപത്ത് ഇന്നലെ വൈകുന്നേരം 5.50നായിരുന്നു ആക്രമണം.
സംഭവത്തില്‍ രണ്ട് സൈനികര്‍ വീരമൃത്യു വരിച്ചു. ഗ്രാമീണന്‍ ഉള്‍പ്പെടെ രണ്ടുപേര്‍ക്ക് പരുക്കേറ്റു. സി.ആര്‍.പി.എഫ് സബ് ഇന്‍സ്‌പെക്ടര്‍ സാഹബ് ശുക്ലയും മറ്റൊരു സൈനികനുമാണ് വീരമൃത്യു വരിച്ചതെന്ന് സൈനിക വക്താവ് അറിയിച്ചു. ജവാന്‍മാരുടെ വാഹനത്തിനു നേരെ മൂന്ന് ഭീകരരാണ് ആക്രമണം നടത്തിയതെന്നും ആക്രമണ ശേഷം ഇവര്‍ തൊട്ടടുത്ത ഡല്‍ഹി പബ്ലിക് സ്‌കൂള്‍ വളപ്പിലേക്ക് കയറിയതായും സി.ആര്‍.പി.എഫ് അറിയിച്ചു. ഇതേതുടര്‍ന്ന് ഭീകരര്‍ക്കായി സി.ആര്‍.പി.എഫും പൊലിസും സംയുക്തമായി തെരച്ചില്‍ തുടങ്ങിയിട്ടുണ്ട്.
ഭീകരാക്രമണമുണ്ടായത് സി.ആര്‍.പി.എഫ് കേന്ദ്രത്തിന് ഒരു കിലോമീറ്റര്‍ അകലെയാണ്. ആക്രമണത്തിന്റെ ഉത്തരവാദിത്തം ലഷ്‌കര്‍ ഭീകരര്‍ ഏറ്റെടുത്തു. ആക്രമണത്തിന്റെ പശ്ചാത്തലത്തില്‍ ശ്രീനഗര്‍-ജമ്മു ദേശീയപാത അടച്ചിട്ടുണ്ട്. ഈ ദേശീയ പാത കേന്ദ്രീകരിച്ച് ഇതാദ്യമായിട്ടല്ല ആക്രമണം ഉണ്ടാകുന്നത്. നിരവധി തവണ ദേശീയപാതയില്‍ സൈനിക വാഹനത്തിനു നേരെ ആക്രമണം ഉണ്ടായിട്ടുണ്ട്.