വാടാനപ്പള്ളി: സ്‌കൂളിലെ സഹപാഠികളൊത്തു തളിക്കുളം സ്‌നേഹതീരം ബീച്ചിലെത്തി കുളിക്കുന്നതിനിടയില്‍ കടലില്‍ അകപ്പെട്ടു മരണത്തോടു മല്ലടിച്ച പ്ലസ് വണ്‍ വിദ്യാര്‍ഥിയെ ലൈഫ് ഗാര്‍ഡുകള്‍ രക്ഷപ്പെടുത്തി. ഇരിങ്ങാലക്കുട ഡോണ്‍ ബോസ്‌ക്കോ സ്‌ക്കൂളിലെ പ്ലസ് വണ്‍ വിദ്യാര്‍ഥി ക്രിസ്റ്റോ സണ്ണിയെയാണു സ്‌നേഹതീരം ബീച്ചിലെ ലൈഫ് ഗാര്‍ഡുകളായ സ്മിനോ ജോയ്, ഹരീഷ്, ഹരിദാസന്‍ എന്നിവര്‍ ചേര്‍ന്നു രക്ഷപ്പെടുത്തിയത്.
കഴിഞ്ഞ ദിവസം വൈകിട്ട് അഞ്ചോടെ സ്‌കൂളില്‍ നിന്നും നാല്‍പ്പത്തി അഞ്ചു വിദ്യാര്‍ഥികളാണ് തളിക്കുളം സ്‌നേഹതീരം ബീച്ചിലെത്തിയത്. കടലില്‍ കുളിക്കുന്നതിനിടയില്‍ ക്രിസ്റ്റോ ഒഴുക്കില്‍പ്പെട്ട് കരയില്‍ നിന്നു നൂറ്റിഅമ്പതു മീറ്ററോളം പടിഞ്ഞാറുമാറി ആഴക്കടലിലേക്ക് മുങ്ങുന്നതിനിടെയാണ് ഗാര്‍ഡുകള്‍ രക്ഷകരായി എത്തിയത്. വിദ്യാര്‍ഥികളെ ശ്രദ്ധയില്‍പ്പെട്ട ലൈഫ് ഗാര്‍ഡുകളായ സ്മിനോയും ഹരീഷും കടലിലേക്ക് എടുത്തു ചാടി പാടുപെട്ട് വെള്ളത്തില്‍ മുങ്ങി താഴ്ന്ന ക്രിസ് റ്റോയെ രക്ഷപ്പെടുത്തി കരയില്‍ എത്തിക്കുകയായിരുന്നു. ഈ സമയം ബീച്ചില്‍ തിരക്കു കൂടുതലായിരുന്നു.
തിരക്ക് നിയന്ത്രിക്കാന്‍ ലൈഫ് ഗാര്‍ഡുകള്‍ ഏറെ ബുദ്ധിമുട്ടി. ഇതിനിടയിലാണു വിദ്യാര്‍ഥി കടലില്‍ അകപ്പെട്ടത്.
ദിവസങ്ങള്‍ക്കു മുന്‍പ് ലൈഫ് ഗാര്‍ഡുകള്‍ ഒഴുക്കില്‍പ്പെട്ട യുവാവിനെ രക്ഷപ്പെടുത്തിയിരുന്നു.