ചേലേമ്പ്ര: സര്‍ക്കാര്‍ നിയോഗിച്ച ഫീസിനേക്കാള്‍ പതിന്‍മടങ്ങ് ഈടാക്കി വിദ്യാര്‍ഥികളെ കൊള്ളയടിക്കുന്ന ഭവന്‍സ് ലോ കോളജ് മനേജ്‌മെന്റ് സമീപനം വിദ്യാര്‍ഥി വിരുദ്ധമാണെന്നും നിലപാട് തിരുത്താന്‍ അവര്‍ തയാറാകണമെന്നും എം.എസ്.എഫ്.സംസ്ഥാന സെക്രട്ടറി നിഷാദ്.കെ.സലീം ആവശ്യപ്പെട്ടു. നീതിതേടി വിദ്യാര്‍ഥികള്‍ നടത്തിവരുന്ന അനിശ്ചിതകാല സമരപന്തല്‍ സന്ദര്‍ശിച്ച് എം.എസ്.എഫിന്റെ ഐക്യദാര്‍ഢ്യം അറിയിച്ച് സംസാരിക്കുകയായിരുന്നു നിഷാദ്. അന്യായമായ ഫീസിനെതിരേ വിദ്യാര്‍ഥികള്‍ ആരംഭിച്ച സമരം ഏഴുനാള്‍ പിന്നിട്ടു . കഴിഞ്ഞ ദിവസത്തെ ചര്‍ച്ചയില്‍ വിദ്യാര്‍ഥികളുടെ ആവശ്യങ്ങള്‍ മാനേജ്‌മെന്റ് അംഗീകരിച്ചില്ല. ചൊവ്വാഴ്ച്ച നടക്കുന്ന ചര്‍ച്ചയില്‍ വിദ്യാര്‍ഥികളുടെ ആവശ്യങ്ങള്‍ പരിഗണിച്ചില്ലെങ്കില്‍ ശക്തമായ പ്രക്ഷോഭങ്ങള്‍ക്ക് എം.എസ്.എഫ് നേതൃത്വം നല്‍കുമെന്നും സര്‍ക്കാരിന്റെയും വിദ്യാഭ്യാസ വകുപ്പിന്റെയും അനാസ്ഥയാണ് ഇത്തരം കോളജുകളുടെ കൊള്ളയ്ക്ക്് കാരണമെന്നും നിഷാദ്.കെ.സലീം പറഞ്ഞു. ബേപ്പൂര്‍ നിയോജക മണ്ഡലം പ്രസിഡന്റ് അനീസ് തോട്ടുങ്ങല്‍, സെക്രട്ടറി നസീഫ് ചെറുവണ്ണൂര്‍ എന്നിവര്‍ സംബന്ധിച്ചു. യൂനിറ്റ്് പ്രസിഡന്റ് സി.ടി സരീര്‍ അക്രം,സെക്രട്ടറി യസീന്‍ കെ.പി,ഷരീഫ് പൈനാട്ടില്‍, ഖലീല്‍ സംസാരിച്ചു.