ഗുവാഹത്തി: അഞ്ചാം സീസണിലും ഗതികിട്ടാതെ അലയുന്ന കേരള ബ്ലാസ്റ്റേഴ്‌സ് ജയം തേടി ഇന്നിറങ്ങുന്നു. ഗുവാഹത്തിയില്‍ നോര്‍ത്ത് ഈസ്റ്റ് യുനൈറ്റഡിനെയാണ് ബ്ലാസ്റ്റേഴ്‌സ് നേരിടുന്നത്. സീസണില്‍ ഏഴ് മത്സരങ്ങള്‍ പൂര്‍ത്തിയാക്കിയപ്പോള്‍ ഒരെണ്ണത്തില്‍ മാത്രമാണ് ബ്ലാസ്‌റ്റേഴ്‌സിന് ജയിക്കാനായത്.
നാല് മത്സരങ്ങള്‍ സമനിലയിലും രണ്ടെണ്ണം തോല്‍വിയിലും കലാശിച്ചു. ബംഗളൂരുവിനെതിരേയും ഗോവക്കെതിരേയുമായിരുന്നു തോല്‍വി. ഇന്നത്തെ മൂന്ന് പോയിന്റ് ബ്ലാസ്റ്റേഴ്‌സിന് വിലപ്പെട്ടതാണ്. നോര്‍ത്ത് ഈസ്റ്റിന് മുന്നിലും കീഴടങ്ങേണ്ടി വന്നാല്‍ ഈ സീസണില്‍ ബ്ലാസ്റ്റേഴ്‌സിന് ഇനി കാര്യമായ പ്രതീക്ഷകളില്ല.