കണ്ണൂര്‍: നിയമസഭാ നടപടികളില്‍ പങ്കെടുക്കാമെന്ന് സുപ്രിംകോടതി അറിയിച്ചതോടെ കെ.എം ഷാജിക്ക് താല്‍ക്കാലികാശ്വാസം. ആനുകൂല്യങ്ങളൊന്നും കൈപ്പറ്റാന്‍ സാധിക്കില്ലെങ്കിലും സ്വന്തം മണ്ഡലത്തിലെ ജനങ്ങളെ പ്രതിനിധീകരിച്ച് ഇനിയും നിയമസഭയില്‍ എത്താനാകുമെന്നതാണ് ഷാജിക്കും മുസ്‌ലിം ലീഗിനും ആശ്വാസമാകുന്നത്.
2016ലെ നിയമസഭാ തെരഞ്ഞെടുപ്പില്‍ അഴീക്കോട് മണ്ഡലത്തില്‍ വര്‍ഗീയ പ്രചാരണം നടത്തി വോട്ട് പിടിച്ചെന്നാരോപിച്ച് എതിര്‍സ്ഥാനാര്‍ഥി എല്‍.ഡി.എഫിന്റെ എം.വി നികേഷ് കുമാറാണ് കെ.എം ഷാജിക്കെതിരേ കോടതിയെ സമീപിച്ചത്. എം.എല്‍.എ സ്ഥാനത്തുനിന്ന് അയോഗ്യനാക്കിയ വിധിക്ക് ഹൈക്കോടതി ഏര്‍പ്പെടുത്തിയ രണ്ടാഴ്ചത്തെ സ്റ്റേ ഇന്ന് അവസാനിക്കാനിരിക്കെയാണ് പാര്‍ട്ടിക്കും ഷാജിക്കും ഏറെ നിര്‍ണായകമായ വാക്കാലുള്ള പരാമര്‍ശം ചീഫ് ജസ്റ്റിസ് രഞ്ജന്‍ ഗൊഗോയുടെ ബെഞ്ചില്‍നിന്നുണ്ടായത്.
അയോഗ്യത എന്ന നാണക്കേടില്‍നിന്നു കോടതി നിരീക്ഷണം താല്‍ക്കാലികമായി രക്ഷയായെങ്കിലും മണ്ഡലത്തില്‍ ഷാജിയുടെ പ്രതിച്ഛായ നിലനിര്‍ത്താനുള്ള നിതാന്ത പരിശ്രമത്തിലാണ് ലീഗ് നേതൃത്വം. ഉന്നത കോടതിയുടെ പരാമര്‍ശം ലീഗിനു നിയമപോരാട്ടം നടത്താന്‍ പുതിയ ഊര്‍ജം നല്‍കും. എന്നാല്‍, ഇത് എത്രനാള്‍ നീണ്ടുനില്‍ക്കുമെന്ന കാര്യത്തില്‍ പാര്‍ട്ടിക്കുള്ളില്‍ തന്നെ ആശങ്കയുയര്‍ന്നിട്ടുണ്ട്.