മാള: പ്രണയാഭ്യര്‍ഥന നിരസിച്ച പെണ്‍കുട്ടിയെ ആക്രമിച്ച സംഭവത്തില്‍ രണ്ടുപേരെ മാള പൊലിസ് അറസ്റ്റു ചെയ്തു.
വെസ്റ്റ് കൊരട്ടി സ്വദേശിയായ തോട്ടൂക്കര സൗരവ് (19), പാറക്കടവ് പുളിയനം കോവാട്ട് നിഥിന്‍ (18) എന്നിവരെയാണ് മാള എസ്.ഐ കെ.ഒ പ്രദീപിന്റെ നേതൃത്വത്തിലുള്ള പൊലിസ് സംഘം അറസ്റ്റു ചെയ്തത്.
മാളയിലെ സ്വകാര്യ കോളജില്‍ പഠിക്കുന്ന പെണ്‍കുട്ടിയെ ബൈക്കിലെത്തി ആക്രമിച്ച സംഭവത്തിലാണ് ഇരുവരേയും അറസ്റ്റു ചെയ്തത്. കഴിഞ്ഞ 12ന് പെണ്‍കുട്ടി നടന്നു പോകവേ മാള പള്ളിക്ക് സമീപം ബൈക്കില്‍ എത്തിയ ഇവര്‍ ബ്ലെയ്ഡുപയോഗിച്ച് കവിള്‍ കീറി മുറിച്ചു.
പ്രണയാഭ്യര്‍ഥന നിരസിച്ച വൈരാഗ്യത്തിലാണ് ഇരുവരും ഈ ക്രൂരകൃത്യം ചെയ്തത്.
പെണ്‍കുട്ടിയുടെ പരാതിയുടെ അടിസ്ഥാനത്തില്‍ ഇന്നലെയാണ് ഇരുവരേയും പിടികൂടിയത്. സൗരവ് അന്നമനടയില്‍ അലൂമിനിയം ഫാബ്രിക്കേഷന്‍ വര്‍ക്കും നിഥിന്‍ മാള ഐ.ടി.ഐ യില്‍ പഠിക്കുകയുമാണ്. സൗരവിനെ അന്നമനടയില്‍ നിന്നും നിഥിനെ വലിയപറമ്പില്‍ നിന്നുമാണു കസ്റ്റഡിയില്‍ എടുത്തത്.
ഇന്ത്യന്‍ ശിക്ഷാ നിയമം 341, 324 തുടങ്ങിയ വകുപ്പുകള്‍ ചേര്‍ത്ത് കേസെടുത്ത പ്രതികളെ ചാലക്കുടി ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി റിമാന്‍ഡ് ചെയ്തു.