മലപ്പുറം: സംസ്ഥാന ജൂനിയര്‍ ഫുട്‌ബോളില്‍ മലപ്പുറം കിരീടം നിലനിര്‍ത്തി. കോട്ടപ്പടി മൈതാനിയില്‍ നടന്ന ഫൈനലില്‍ 2-1ന് തിരുവനന്തപുരത്തെ കീഴടക്കിയാണ് മലപ്പുറം തുടര്‍ച്ചയായി രണ്ടാം തവണയും ജേതാക്കളായത്.
കളിയുടെ രണ്ടാം മിനുട്ടില്‍ തന്നെ മലപ്പുറത്തിന് മികച്ച അവസരം ലഭിച്ചെങ്കിലും മുതലാക്കാനായില്ല. 10ാം മിനുട്ടില്‍ ഫൗളിലൂടെ മലപ്പുറത്തിന് ലഭിച്ച ഫ്രീകിക്കിലൂടെയാണ് ആദ്യ ഗോള്‍ പിറന്നത്. കിക്കെടുത്ത പി. ജിഷ്ണു വല ചലിപ്പിച്ചു. ആദ്യ പകുതിയുടെ അവസാനം വരെ കാര്യമായ മുന്നേറ്റം നടത്താന്‍ തിരുവനന്തപുരം ടീമിനായില്ല.
കളിയുടെ രണ്ടാം പകുതിയില്‍ 43ാം മിനുട്ടിലാണ് മലപ്പുറത്തിന്റെ രണ്ടാം ഗോള്‍ പിറന്നത്. ഇത്തവണ അനസാണ് മലപ്പുറത്തിനായി പന്ത് വലയിലെത്തിച്ചത്.
65ാം മിനുട്ടില്‍ തിരുവനന്തപുരത്തിന്റെ രാഹുല്‍ രാജു ടീമിനായി ഗോള്‍ നേടിയതോടെ സ്‌കോര്‍ 2-1ലെത്തി. പിന്നീടങ്ങോട്ട് തിരുവനന്തപുരം ടീമിന് ഗോള്‍ നേടാന്‍ അവസരം നല്‍കാതിരുന്നതോടെ കിരീടം വീണ്ടും മലപ്പുറം മണ്ണില്‍.
വിജയിക്കള്‍ക്ക് കെ.എഫ്.എ പ്രസിഡന്റ് ടോം ജോസ് കുന്നേല്‍ ട്രോഫി നല്‍കി. റണ്ണേഴ്‌സ് അപ്പിനുള്ള ട്രോഫി മലപ്പുറം ജില്ലാ പൊലിസ് മേധാവി യു. അബ്ദുല്‍ കരീം കൈമാറി.
തിരുവനന്തപുരത്തിന്റെ രാഹുല്‍രാജുവാണ് ചാംപ്യന്‍ഷിപ്പിലെ ടോപ് സ്‌കോറര്‍.