ചങ്ങരംകുളം: കനത്തമഴയെ തുടര്‍ന്നുണ്ടായ അഞ്ച് അപകടങ്ങളില്‍ പതിനഞ്ചുപേര്‍ക്ക് പരുക്കേറ്റു. പാവിട്ടപ്പുറം, കടവല്ലൂര്‍, ഒതളൂര്‍ എന്നിവടങ്ങളിലാണ് അപകടമുണ്ടായത്. ചൂണ്ടല്‍-കുറ്റിപ്പുറം സംസ്ഥാന പാതയില്‍ പാവിട്ടപ്പുറം മാങ്കുളത്ത് ഓടയില്‍ വെള്ളം കയറാതെ റോഡില്‍ കെട്ടി നിന്നതിനെ തുടര്‍ന്ന് ബൈക്ക് യാത്രികര്‍ക്കാണ് പരുക്കേറ്റത്.
ഇന്നലെ കാലത്ത് പത്തരയോടെ പൊന്നാനിയിലെ ബന്ധുവീട്ടിലേക്ക് പോകുകയായിരുന്ന പെരുമ്പിലാവ് സ്വദേശി അന്‍ഷാദിനും(26) ഭാര്യ ഫര്‍സാനക്കു(22)മാണ് പരുക്കേറ്റത്. ബൈക്ക് യാത്രക്കിടെ പെട്ടെന്ന് റോഡില്‍ വെള്ളക്കെട്ട് കണ്ട് വാഹനം നിര്‍ത്താന്‍ ശ്രമിച്ചപ്പോള്‍ നിയന്ത്രണം വിട്ട് ബൈക്ക് വീഴുകയായിരുന്നു. അന്‍ഷാദിന്റെ കൈക്കും ഫര്‍സാനയുടെ കാലിനും പരുക്കേറ്റിട്ടുണ്ട്. പാവിട്ടപ്പുറം മാങ്കുളത്ത് തന്നെയുണ്ടായ മറ്റൊരു അപകടത്തില്‍ രണ്ടു പേര്‍ക്ക് പരുക്കേറ്റു. കടവല്ലൂര്‍ കിഴക്കുമുറി സ്വദേശികളായ വാസു (42), കടവല്ലൂര്‍ അമ്പലം സ്വദേശി മണികുട്ടന്‍ (34) എന്നിവര്‍ക്കാണ് പരുക്കേറ്റത്.
ഇന്നലെ ഉച്ചയോടെ ഒതളൂര്‍ പാടത്ത് അയിനൂര്‍ റോഡില്‍ വെള്ളം കയറിയതിനെ തുടര്‍ന്ന് റോഡിലെ കുഴിയില്‍ വീണ് കുട്ടികള്‍ അടക്കം നാലു പേര്‍ക്ക് പരുക്കേറ്റു. കോട്ടോല്‍ സ്വദേശി നസ്മുദ്ദീന്‍ (38), ഭാര്യ നജിന (31), കുട്ടികളായ ഷിഫ, ഷാക്കിര്‍ എന്നിവര്‍ക്കാണു പരുക്കേറ്റത്. കടവല്ലൂരില്‍ ബൈക്കുകള്‍ കൂട്ടിയിടിച്ചുണ്ടായ അപകടത്തില്‍ നാലു പേര്‍ക്ക് പരുക്കേറ്റു. കണ്ണൂര്‍ സ്വദേശികളായ സവാദ് (19), മിജാസ് അലി (22), ഷമീം (24), തലശ്ശേരി സ്വദേശി അബുസുഫിയാന്‍ (23) എന്നിവര്‍ക്കാണ് പരുക്കേറ്റത്.
പാവിട്ടപ്പുറം സെന്ററില്‍ പുലര്‍ച്ചെ ഒരു മണിയോടെ ഉണ്ടായ അപകടത്തില്‍ മൂന്നുപേര്‍ക്ക് പരുക്കേറ്റു. എറണാകുളത്ത് നിന്നും മഞ്ചേരിയിലേക്ക് പോകുകയായിരുന്ന കോട്ടക്കല്‍ സ്വദേശികളായ ജാബിര്‍ (36) സൈഫുദ്ദീന്‍ (25), മഞ്ചേരി ഫര്‍ഷാദ് (30) എന്നിവര്‍ സഞ്ചരിച്ച കാര്‍ പാവിട്ടപ്പുറത്തെ ഇറക്കത്തോടൊപ്പം ഉള്ള വളവ് കഴിഞ്ഞ് നിയന്ത്രണം വിട്ട് ഡിവൈഡറിനുള്ളി ഇടിക്കുകയായിരുന്നു. അമിത വേഗതയാണ് അപകട കാരണമെന്ന് നാട്ടുകാര്‍ പറഞ്ഞു.
പരുക്കേറ്റവരെ ചങ്ങരംകുളത്തേയും കുന്ദംകുളത്തേയും സ്വകാര്യ ആശുപത്രികളില്‍ പ്രവേശിപ്പിച്ചു.