മേപ്പയ്യൂര്‍: മങ്ങാട്ടുമ്മല്‍ ശ്രീ പരദേവതാ ക്ഷേത്രം, കൂനം വള്ളിക്കാവ് ശ്രീ പരദേവതാ ക്ഷേത്രം എന്നിവിടങ്ങളിലെ റോഡിന്റെ വശങ്ങളിലുള്ള ഭണ്ഡാരങ്ങള്‍ കുത്തിത്തുറന്നും ടൗണിലെ രണ്ടു പെട്ടിക്കടകളിലും മോഷണം. തിങ്കളാഴ്ച രാത്രിയിലാണ് സംഭവം നടന്നത്. പെട്ടിക്കടയുടെ പൂട്ടുപൊളിച്ചെങ്കിലും കാര്യമായി ഒന്നും നഷ്ടപ്പെട്ടില്ലെന്നാണ് പൊലിസ് നിഗമനം.
മേപ്പയൂര്‍ ടൗണിലെ തെരുവുവിളക്കുകള്‍ കത്താത്തത് മോഷ്ടാക്കള്‍ക്ക് അനുഗ്രഹമായെന്ന പരാതി ഉയര്‍ന്നിട്ടുണ്ട്. ഇവ പുനഃസ്ഥാപിക്കണമെന്ന നാട്ടുകാരുടെയും വ്യാപാരികളുടെയും ആവശ്യത്തിന് അധികൃതരുടെ ഭാഗത്ത് നിന്ന് അനുകൂല നിലപാടുണ്ടാകാത്തതില്‍ പ്രതിഷേധം ശക്തമായിട്ടുണ്ട്. കവര്‍ച്ച നടന്ന സ്ഥലത്ത് മേപ്പയൂര്‍ പൊലിസെത്തി പ്രാഥമിക തെളിവെടുത്തു. മേപ്പയ്യൂരില്‍ പൊലിസ് പട്രോളിങ് ശക്തമാക്കുമെന്ന് എസ്.ഐ ജി.എസ് അനില്‍ പറഞ്ഞു.