തൃശൂര്‍: തൃശൂര്‍ ജില്ലയിലെ അഞ്ച് പഞ്ചായത്തുകളില്‍ നിന്നായി ആറ് വിദ്യാര്‍ഥികളെ കാണാതായതായി പരാതി. ചൊവ്വാഴ്ചയാണ് എല്ലാവരെയും കാണാതായതായി പരാതി ലഭിച്ചിരിക്കുന്നത്. കാണാതായവര്‍ പുരുഷ സുഹൃത്തുകള്‍ക്കൊപ്പം പോയതാണെന്നും സൂചനയുണ്ട്. 

വടക്കാഞ്ചേരി, അയ്യന്തോള്‍, പുതുക്കാട്, മാള, പാവറട്ടി തുടങ്ങിയ പൊലിസ് സ്റ്റേഷന്‍ പരിധിയിലുള്ള സ്‌കൂളുകളിലും കോളേജുകളിലും പഠിക്കുന്ന പെണ്‍കുട്ടികളെയാണ് ഒരേ ദിവസം കാണാതായിരിക്കുന്നത്. ഇവരില്‍ ഒരാള്‍ക്ക് പ്രായപൂര്‍ത്തിയായിട്ടില്ല.
കാണാതായതിന്റെ കാരണം വ്യക്തമായിട്ടില്ലെങ്കിലും ആറുപേരെ ഒരേ ദിവസം കാണാതായ സംഭവം പൊലിസിനേയും നാട്ടുകാരെയും ഞെട്ടിച്ചിട്ടുണ്ട്. ഇവര്‍ പരസ്പരം പരിചയമുള്ളവരാണോ എന്നും അറിവായിട്ടില്ല. പൊലിസ് അന്വേഷണം ശക്തമാക്കിയിട്ടുണ്ട്.

തൃശ്ശൂര്‍ നഗരത്തിലേയും റൂറലിലേയും ഉദ്യോഗസ്ഥര്‍ കാണാതായ പെണ്‍കുട്ടികള്‍ക്കായി അന്വേഷണം ആരംഭിച്ചിട്ടുണ്ട്. അതേ സമയം പുതുക്കാടു നിന്നും കാണാതായ പെണ്‍കുട്ടിയെ കൊല്ലത്തുനിന്നും കണ്ടെത്തിയതായും റിപ്പോര്‍ട്ടുണ്ട്.