ന്യൂഡല്‍ഹി: ഇന്ത്യയ്ക്കും പാകിസ്താനുമിടയിലെ സിഖ് തീര്‍ഥാടന കേന്ദ്രമായ കര്‍താര്‍പൂര്‍ ദര്‍ബാര്‍ സാഹിബ് ഗുരുദ്വാരയിലേക്കുള്ള ഇടനാഴിയുടെ ശിലാസ്ഥാപനം ഇന്ന് ഉപരാഷ്ട്രപതി വെങ്കയ്യ നായിഡു നിര്‍വഹിക്കും.
ഗുരുദ്വാരയിലേക്കുള്ള ഇന്ത്യയിലെ രണ്ടു കിലോമീറ്റര്‍ പാതയുടെ ഉദ്ഘാടനമാണ് പഞ്ചാബിലെ അന്താരാഷ്ട്ര അതിര്‍ത്തി പ്രദേശമായ ഗുരുദാസ്പൂരിലെ മന്ന് ഗ്രാമത്തില്‍ നടക്കുക. കേന്ദ്ര ഗതാഗത മന്ത്രി നിതിന്‍ ഗഡ്കരി, കേന്ദ്ര മന്ത്രി ഹര്‍സിമ്രത്ത് കൗര്‍ ബാദല്‍, പഞ്ചാബ് മുഖ്യമന്ത്രി അമരീന്ദര്‍ സിങ് എന്നിവര്‍ ചടങ്ങില്‍ പങ്കെടുക്കും.
സിഖ് മതസ്ഥാപകനായ ഗുരുനാനാക്കിന്റെ 550ാം ജന്മദിനത്തിന്റെ ഭാഗമായാണ് ഇടനാഴി നിര്‍മാണത്തിന് ഈ മാസം 22ന് ഇന്ത്യ അനുമതി നല്‍കിയത്. പാത നിര്‍മാണത്തിനു പാകിസ്താന്‍ നേരത്തെ അനുമതി നല്‍കിയിരുന്നു. പാകിസ്താന്‍ പാതയുടെ ഉദ്ഘാടനം ബുധനാഴ്ച പ്രധാനമന്ത്രി ഇമ്രാന്‍ ഖാന്‍ നിര്‍വഹിക്കും.
അതേസമയം, പാകിസ്താനിലേക്കുള്ള പാത ശിലാസ്ഥാപനത്തിനുള്ള പാക് വിദേശകാര്യ മന്ത്രാലയത്തിന്റെ ക്ഷണം പഞ്ചാബ് മുഖ്യമന്ത്രി അമരീന്ദര്‍ സിങ് നിരസിച്ചു. പഞ്ചാബിലുണ്ടായ തീവ്രവാദി ആക്രമണത്തിലും അതിര്‍ത്തിയില്‍ ഇന്ത്യന്‍ സൈന്യത്തെ കൊലപ്പെടുത്തുന്നതിലും പ്രതിഷേധിച്ചാണ് ക്ഷണം നിരസിച്ചത്.