ലഖ്‌നൗ: അഫ്ഗാനിസ്ഥാനെതിരായ ഏകദിന പരമ്പര തൂത്തുവാരി വിന്‍ഡീസ്. ഇന്നലെ നടന്ന മൂന്നാം മത്സരം അഞ്ച് വിക്കറ്റിന് ജയിച്ചതോടെയാണിത്.
ടോസ് നഷ്ടപ്പെട്ട് ബാറ്റിങിനിറങ്ങിയ അഫ്ഗാന്‍ ഏഴിന് 249 റണ്‍സില്‍ പുറത്തായപ്പോള്‍ മറുപടിക്കിറങ്ങിയ വിന്‍ഡീസ് 48.4 ഓവറില്‍ അഞ്ച് വിക്കറ്റ് നഷ്ടത്തില്‍ 253 റണ്‍സെടുക്കുകയായിരുന്നു. ഷായ് ഹോപ്പിന്റെ സെഞ്ചുറിയാണ് (145 പന്തില്‍ പുറത്താവാതെ 109) വിന്‍ഡീസ് വിജയം എളുപ്പമാക്കിയത്. ഷായ് ഹോപ്പാണ് കളിയിലെ താരം.
റോസ്റ്റന്‍ ചേസിനെ പരമ്പരയിലെ താരമായും തിരഞ്ഞെടുത്തു. ബ്രാണ്ടന്‍ കിങ് (39) നിക്കോളാസ് പൂരന്‍ (21) കീറോണ്‍ പൊള്ളാര്‍ഡ് (32 പന്തില്‍ 42) എന്നിവരുടെ സ്‌കോറും വിന്‍ഡീസ് വിജയത്തിന് നിര്‍ണായകമായി. അഫ്ഗാനിസ്ഥാനു വേണ്ടി മുജീബ് റഹ്മാന്‍ രണ്ട് വിക്കറ്റ് വീഴ്ത്തി.
നേരത്തേ അസ്ഗര്‍ അഫ്ഗാന്‍ (85 പന്തില്‍ 86), ഹസ്രത്തുള്ള (59 പന്തില്‍ 50), മുഹമ്മദ് നബി (50) എന്നിവരുടെ പ്രകടനങ്ങളാണ് അഫ്ഗാന് ഭേദപ്പെട്ട സ്‌കോര്‍ സമ്മാനിച്ചത്. വിന്‍ഡീസിനായി കീമോ പോള്‍ മൂന്നും അള്‍സാരി രണ്ടും വിക്കറ്റുകള്‍ വിഴ്ത്തി.