മഞ്ചേരി: സ്‌കൂള്‍ വിദ്യാര്‍ഥിയെ പ്രകൃതി വിരുദ്ധ ലൈംഗിക പീഡനത്തിനിരയാക്കിയ സംഭവത്തില്‍ ഓട്ടോ ഡ്രൈവര്‍ പിടിയില്‍. വള്ളിക്കാപ്പറ്റ സ്വദേശി ശിഹാബുദ്ദീന്‍ (32) ആണ് അറസ്റ്റിലായത്. വീട്ടുകാരുടെ പരാതിയെ തുടര്‍ന്ന് മഞ്ചേരി പൊലിസ് നടത്തിയ അന്വേഷണത്തിനൊടുവില്‍ സി.ഐ എന്‍.ബി ഷൈജുവിന്റെ നേതൃത്വത്തിലുള്ള പൊലിസ് സംഘം ഓട്ടോ ഡ്രൈവറായ പ്രതിയെ പിടികൂടുകയായിരുന്നു.
മഞ്ചേരിയില്‍ നിന്നും ഓട്ടോറിക്ഷയില്‍ വീട്ടിലേക്കു പോകുംവഴി കുട്ടിയെ ബ്ലേഡു കാണിച്ചു ഭീഷണിപ്പെടുത്തി പീഡനത്തിനിരയാക്കുകയായിരുന്നെന്നാണ് പരാതി. സംഭവം പുറത്തു പറഞ്ഞാല്‍ കൊല്ലുമെന്നു ഭീഷണിപ്പെടുത്തിയതായും കുട്ടി പരാതിപ്പെട്ടു. സംഭവശേഷം ഒളിവിലായിരുന്ന പ്രതിയെ തുടരന്വേഷണത്തിലൂടെയാണ് പൊലിസ് നിയമത്തിനു മുന്നില്‍ കൊണ്ടുവന്നത്. എസ്.ഐ ജലീല്‍ കറുത്തേടത്ത്, പ്രത്യേക അന്വേഷണ സംഘാംഗങ്ങളായ ഉണ്ണികൃഷ്ണന്‍ മാരാത്ത് ,ദിനേഷ്, മുഹമ്മദ് സലീം എന്നിവരാണ് അന്വേഷണ സംഘത്തിലുണ്ടായിരുന്നത്. പ്രതിയെ കോടതി റിമാന്‍ഡു ചെയ്തു.