മഞ്ചേരി: വിദ്യാര്‍ഥിനിയെ അപമാനിക്കാന്‍ ശ്രമിച്ച കേസില്‍ യുവാവ് അറസ്റ്റില്‍. കാരകുന്ന് ചെറുപള്ളിക്കല്‍ സ്വദേശി അബ്ദുല്‍ അസീസ് (40) ആണ് പിടിയിലായത്. നാട്ടുകാര്‍ പിടികൂടി പൊലിസിലേല്‍പിച്ച പ്രതിയെ മഞ്ചേരി സി.ഐ എന്‍.ബി ഷൈജുവിന്റെ നേതൃത്വത്തിലുള്ള പോലിസ് സംഘം അറസ്റ്റു ചെയ്യുകയായിരുന്നു.
കഴിഞ്ഞ ദിവസം മഞ്ചേരി ഗവ. ഗേള്‍സ് ഹയര്‍ സെക്കന്‍ഡറി സ്‌കൂളിനു സമീപമാണ് കേസിനാസ്പദമായ സംഭവം. വിദ്യാലയത്തിനടുത്തുള്ള ഫാന്‍സി കടയിലെത്തിയ വിദ്യാര്‍ഥിനിയെ ജീവനക്കാരനായ അബ്ദുല്‍ അസീസ് അപമാനിക്കാന്‍ ശ്രമിക്കുകയായിരുന്നു. വിദ്യാലയത്തിലെത്തിയ കുട്ടിയുടെ പരാതിപ്രകാരമാണ് പൊലിസ് യുവാവിനെ കസ്റ്റഡിയിലെടുത്തത്. സമാന രീതിയില്‍ വിദ്യാര്‍ഥികളെ പീഡിപ്പിക്കാന്‍ അറസ്റ്റിലായ പ്രതി ശ്രമം നടത്തിയതായി വിവരമുണ്ട്. അറസ്റ്റിലായ യുവാവിനെ കോടതി റിമാന്‍ഡു ചെയ്തു.