കോഴിക്കോട്: സി പി എം കോഴിക്കോട് ജില്ലാ കമ്മിറ്റി ഓഫീസിന് നേരെ ബോംബെറിഞ്ഞ് ജില്ലാ സെക്രട്ടറിയെ അപായപ്പെടുത്താന്‍ ശ്രമിച്ച കേസില്‍ രണ്ടു ആര്‍.എസ്.എസ് പ്രവര്‍ത്തകര്‍ അറസ്റ്റില്‍.

ആര്‍.എസ്.എസ് കോഴിക്കോട് ജില്ലാ കാര്യവാഹക് എന്‍.പി. രൂപേഷ്, നാദാപുരം സ്വദേശിയും ആര്‍.എസ്.എസ് പ്രവര്‍ത്തകനുമായ ഷിജിന്‍ എന്നിവരെയാണ് ക്രൈം ബ്രാഞ്ച് അറസ്റ്റ് ചെയ്തത്.

കഴിഞ്ഞ വര്‍ഷം ജൂണ്‍ ഒമ്പതിനായിരുന്നു സംഭവം. ക്രിസ്ത്യന്‍ കോളജിന് സമീപമുള്ള സിപിഐഎം ജില്ലാ കമ്മിറ്റി ഓഫീസായ സി.എച്ച് കണാരന്‍ സ്മാരകമന്ദിരത്തിന് നേരെ ബോംബെറിഞ്ഞ് പി.മോഹനന്‍ മാസ്റ്ററെ കൊല്ലാന്‍ ശ്രമിച്ചുവെന്നാണ് കേസ്.

മോഹനന്‍ മാസ്റ്റര്‍ കാറില്‍ നിന്നിറങ്ങി ഓഫീസ് വരാന്തയിലേക്ക് കയറുമ്പോഴായിരുന്നു ബോംബേറുണ്ടായത്. സംഭവത്തില്‍ ഒരു ഓഫീസ് ജീവനക്കാരന് പരുക്കേല്‍ക്കുകയും ചെയ്തിരുന്നു.