സംബല്‍പുര്‍: ഒഡിഷയില്‍ നടക്കുന്ന കുച്ച്ബിഹാര്‍ ട്രോഫി ക്രിക്കറ്റില്‍ ഒഡിഷക്കെതിരേ കേരളത്തിന് റെക്കോര്‍ഡ് സ്‌കോര്‍. ക്യാപ്റ്റന്‍ വത്സണ്‍ ഗോവിന്ദിന്റെ ട്രിപ്പിള്‍ സെഞ്ചുറിയുടെ കരുത്തിലാണ് കേരളം കൂറ്റന്‍ സ്‌കോര്‍ പടുത്തുയര്‍ത്തിയത്.
ആദ്യ ഇന്നിങ്‌സില്‍ അഞ്ച് വിക്കറ്റ് നഷ്ടത്തില്‍ 651 റണ്‍സിനാണ് കേരളം ഡിക്ലയര്‍ ചെയ്തത്. കേരളത്തിന്റെ ഏറ്റവും ഉയര്‍ന്ന് സ്‌കോറാണിത്. 2007-08ല്‍ സര്‍വിസസിനെതിരേ രഞ്ജി ട്രോഫിയില്‍ നേടിയ ആറുവിക്കറ്റ് നഷ്ടത്തില്‍ 566 റണ്‍സ് എന്നതായിരുന്നു ഇതിന് മുന്‍പ് കേരളത്തിന്റെ മികച്ച സ്‌കോര്‍.ട്രിപ്പിള്‍ സെഞ്ചുറി നേടുന്ന രണ്ടാമത്തെ കേരള താരമാകാനും വത്സന് ഗോവിന്ദിന് സാധിച്ചു. ഇതിന് മുന്‍പ് സര്‍വിസസിനെതിരേ കേരളാ താരം ശ്രീകുമാര്‍ നേടിയ 306 റണ്‍സാണ് ആദ്യ ട്രിപ്പിള്‍ സെഞ്ചുറി.
മറുപടി ബാറ്റിങ്ങിനിറങ്ങിയ ഒഡിഷ രണ്ടാം ദിനം കളി നിര്‍ത്തുമ്പോള്‍ ഒരു വിക്കറ്റിന് 62 റണ്‍സ് എന്ന നിലയിലാണ്.10 റണ്‍സുമായി മിത്രബാനു പാണ്ഡെയും 18 റണ്‍സുമായി രഘുനാഥ് മല്ലയുമാണ് ക്രീസില്‍. കേരളത്തിന്റെ ബൗളിങ് നിര ഇന്ന് മികച്ച പ്രകടനം പുറത്തെടുക്കുകയാണെങ്കില്‍ മത്സരം കേരളത്തിന്റെ വരുതിയിലാക്കാനാകും.