കൊച്ചി: മാവോയിസ്റ്റ് ബന്ധം ആരോപിച്ച് അറസ്റ്റിലായ വിദ്യാര്‍ഥികളും സി.പി.എം പ്രവര്‍ത്തകരുമായ അലന്‍ ഷുഹൈബിന്റെയും താഹ ഫസലിന്റെയും ജാമ്യാപേക്ഷയില്‍ കേസ്ഡയറി ഹാജരാക്കാന്‍ പൊലിസിന് ഹൈക്കോടതി നിര്‍ദേശം. അടുത്ത 18നു കേസ് ഡയറി ഹാജരാക്കാനാണ് നിര്‍ദേശിച്ചിട്ടുള്ളത്. കോഴിക്കോട് സെഷന്‍സ് കോടതിയില്‍ സമര്‍പ്പിച്ച ജാമ്യാപേക്ഷ തള്ളിയതിനെതുടര്‍ന്ന് സമര്‍പ്പിച്ച അപ്പീലാണ് ഹൈക്കോടതിയുടെ പരിഗണനയിലുള്ളത്.
കഴിഞ്ഞ നവംബര്‍ ഒന്നിന് പൊലിസ് പട്രോളിങിനിടെ നിരോധിത സംഘടനയായ സി.പി.ഐ( മാവോയിസ്റ്റ്)യുടെ പുസ്തകം ഒരു പ്ലാസ്റ്റിക് കവറില്‍ പൊതിഞ്ഞ് ബാഗില്‍ സൂക്ഷിച്ച നിലയില്‍ ഇവരില്‍നിന്ന് കണ്ടെത്തിയെന്നാണ് പ്രോസിക്യൂഷന്‍ ആരോപണം. നിരോധിത സംഘടനയുടെ പ്രവര്‍ത്തനത്തിനായി സംഘടിച്ചുവെന്നതിനു യാതൊരു അടിസ്ഥാനവുമില്ലെന്നും അപ്പീല്‍ ഹരജിയില്‍ പറയുന്നു. ജസ്റ്റിസുമാരായ എ. ഹരിപ്രസാദും എന്‍. അനില്‍കുമാറും അടങ്ങുന്ന ഡിവിഷന്‍ ബെഞ്ചാണ് ഹരജി പരിഗണിച്ചത്.