തൃശൂര്‍: 10 വര്‍ഷത്തിലേറെയായി ജയിലില്‍ കഴിയുന്ന ജീവപര്യന്തം തടവുകാരനു മാതാപിതാക്കളെയും അനാഥാലയത്തില്‍ കഴിയുന്ന ഭാര്യയെയും കുട്ടികളെയും കാണാന്‍ പരോള്‍ അനുവദിക്കണമെന്ന് മനുഷ്യാവകാശ കമ്മിഷന്‍. വരുന്ന ജയില്‍ ഉപദേക സമിതി യോഗത്തില്‍ വിഷയം ഒരിക്കല്‍ കൂടി പരിഗണിക്കണമെന്നും കമ്മിഷന്‍ ജുഡീഷ്യല്‍ അംഗം പി. മോഹനദാസ് ഉത്തരവിട്ടു. വിയ്യൂര്‍ സെന്‍ട്രല്‍ ജയിലിലെ 1483-ാം നമ്പര്‍ തടവുകാരന്‍ മണികണ്ഠനു പരോള്‍ അനുവദിക്കണമെന്നാണ് ഉത്തരവ്. മണികണ്ഠനു നാളിതുവരെ പരോള്‍ അനുവദിച്ചിട്ടില്ലെന്ന് അദ്ദേഹം സമര്‍പ്പിച്ച പരാതിയില്‍ പറയുന്നു. കമ്മിഷന്‍ ജയില്‍ മേധാവിയില്‍ നിന്നും റിപ്പോര്‍ട്ട് വാങ്ങി. പരാതിക്കാരനെ മുട്ടം സെഷന്‍സ് കോടതി എസ്.സി 23110 നമ്പര്‍ കേസിലാണ് ജീവപര്യന്തം തടവിനു വിധിച്ചതെന്ന് റിപ്പോര്‍ട്ടില്‍ പറയുന്നു. 320, 396 വകുപ്പുകള്‍ പ്രകാരമായിരുന്നു ശിക്ഷ. 392 മുതല്‍ 401 വരെയുള്ള വ്യവസ്ഥകള്‍ പ്രകാരം ശിക്ഷ ലഭിക്കുന്ന തടവുകാര്‍ക്ക് അവധിക്ക് അര്‍ഹതയില്ല. ജയില്‍ നിയമപ്രകാരം ഒന്നിലധികം തവണ ക്രമസമാധാന പ്രശ്‌നം ചൂണ്ടികാണിച്ച് സ്റ്റേഷന്‍ ഹൗസ് ഓഫിസര്‍മാരുടെ റിപ്പോര്‍ട്ട് ലഭിക്കുകയാണെങ്കില്‍ അവധി നല്‍കാന്‍ ബുദ്ധിമുട്ടുണ്ട്. എന്നാല്‍ ഇതേ തടവുകാരന് മറ്റെല്ലാ തരത്തിലും അവധി ലഭിക്കാന്‍ യോഗ്യതയുണ്ടെങ്കില്‍ അക്കാര്യം സര്‍ക്കാരിന് ശുപാര്‍ശ ചെയ്യുമെന്നും റിപ്പോര്‍ട്ടില്‍ പറയുന്നു. 10 വര്‍ഷം പൂര്‍ത്തിയായ തടവുകാരന് വേണ്ടി പൊലിസ്, പ്രൊബേഷന്‍ ഓഫിസര്‍ എന്നിവരില്‍ നിന്നും റിപ്പോര്‍ട്ട് വരുത്തിയെങ്കിലും അത് അനുകൂലവും പ്രതികൂലവുമായിരുന്നു. ജയില്‍ ഉപദേശക സമിതി പരോള്‍ പരിശോധിച്ചെങ്കിലും ഉത്തരവ് തടവുകാരന് പ്രതികൂലമായി. 2018 ലെ പുനരവലോകനസമിതിയോഗം തടവുകാരന്റെ അപേക്ഷ വീണ്ടും പരിഗണിക്കാന്‍ ജയില്‍ ഉപദേശകസമിതിക്ക് നല്‍കിയിട്ടുണ്ട്. തടവുകാരന്റെ മാതാപിതാക്കളും കുടുംബവും മറ്റുള്ളവരുടെ സഹായത്താലാണ് ജീവിക്കുന്നത്. അതുകൊണ്ടുതന്നെ പരോള്‍ അനുവദിക്കുന്ന കാര്യം ഒരിക്കല്‍ കൂടി പരിഗണിക്കണമെന്നും പി. മോഹനദാസ് ആവശ്യപ്പെട്ടു.