ചെങ്ങന്നൂര്‍: ചെങ്ങന്നൂര്‍ ബി.ആര്‍.സിയുടെ ആഭിമുഖ്യത്തില്‍ ഭിന്നശേഷി വാരാചരണത്തിന് തുടക്കമായി. ഭിന്നശേഷിക്കാരെ ശക്തിപ്പെടുത്തുക, ഉള്‍ച്ചേര്‍ക്കുക, സമത്വം ഉറപ്പാക്കുക എന്ന ലക്ഷ്യത്തോടെയാണ് വാരാചരണം. ഭിന്നശേഷിക്കാരായ കുട്ടികളുടെ സര്‍വതോന്മുഖമായ വളര്‍ച്ച മുന്‍നിര്‍ത്തി ഐക്യരാഷ്ട്രസഭയുടെ നേതൃത്വത്തില്‍ ഡിസംബര്‍ മൂന്നിനാണ് ഭിന്നശേഷിദിനം ആചരിക്കുന്നത്.
വാരാചരണത്തോടനുബന്ധിച്ച് സമഗ്രശിക്ഷ കേരളം വിവിധ കര്‍മപരിപാടികള്‍ ആസൂത്രണം ചെയ്തു. വിദ്യാലയപ്രവര്‍ത്തനങ്ങളില്‍ ഭിന്നശേഷിക്കാരായ കുട്ടികള്‍ക്കും അവസരങ്ങള്‍ ഉറപ്പാക്കുന്നതിന്റെ ഭാഗമായി സ്‌കൂള്‍തലത്തില്‍ യു.പി വിഭാഗം ചിത്രരചന, പോസ്റ്റര്‍രചന, എച്ച്.എസ് വിഭാഗം ഉപന്യാസരചന മത്സരങ്ങള്‍ നടത്തി. വിളംബര റാലി ചെങ്ങന്നൂര്‍ ബ്ലോക്ക് പഞ്ചായത്ത് പ്രസിഡന്റ് എന്‍. സുധാമണി ഫ്‌ളാഗ് ഓഫ് ചെയ്തു. കണ്ണടകളുടെ വിതരണം ബ്ലോക്ക് പഞ്ചായത്ത് വൈസ്് പ്രസിഡന്റ് വിവേക് നിര്‍വഹിച്ചു. യോഗത്തില്‍ ബ്ലോക്ക് പ്രോഗ്രാം ഓഫിസര്‍ ജി കൃഷ്ണകുമാര്‍ അധ്യക്ഷനായി. അധ്യാപക പ്രതിനിധികള്‍, ക്ലസ്റ്റര്‍ കോഡിനേറ്റര്‍മാര്‍, റിസോഴ്‌സ് അധ്യാപകര്‍, രക്ഷകര്‍ത്താക്കള്‍ പങ്കെടുത്തു.