ഓയൂര്‍: വെളിയം പടിഞ്ഞാറ്റിന്‍കരയില്‍ വീട്ടിനുള്ളില്‍ വില്‍പനയ്ക്കായി സൂക്ഷിച്ചിരുന്ന രണ്ടു കിലോ കഞ്ചാവുമായി യുവാവ് പിടിയില്‍.
പടിഞ്ഞാറ്റിന്‍കര ചൂരക്കോട് മോഹനത്തില്‍ അനന്ദു(23)വാണ് പിടിയിലായത്.
റൂറല്‍ എസ്.പി. അശോകന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ സ്‌പെഷല്‍ സ്‌ക്വാഡും പൂയപ്പള്ളി പൊലിസും ചേര്‍ന്നു നടത്തിയ പരിശോധനയില്‍ ഇന്നലെ വൈകിട്ട് നാലിനാണ് കഞ്ചാവ് പിടിച്ചെടുത്തത്. ബാഗിനുള്ളിലാണ് കഞ്ചാവ് സൂക്ഷിച്ചിരുന്നത്. സ്‌കൂള്‍, കോളജ് വിദ്യാര്‍ഥികള്‍ക്കാണ് ഇയാള്‍ കഞ്ചാവ് വില്‍പന നടത്തിവന്നത്. തമിഴ്‌നാട്ടിലെ കമ്പത്തു നിന്ന് ബൈക്കിലും ട്രെയിനിലുമായാണ് കഞ്ചാവ് കടത്തുന്നത്. ഒരു കിലോ കഞ്ചാവ് 15,000 രൂപക്ക് വാങ്ങി 10 ഗ്രാം വീതമുള്ള ചെറുപൊതികളാക്കി പൊതി ഒന്നിന് 50 രൂപക്കാണ് വില്‍പന നടത്തുന്നത്. കിലോയ്ക്ക് 50,000 രൂപയോളം ലഭിക്കും. ഒരു വര്‍ഷമായി കഞ്ചാവ് കച്ചവടം നടത്തിവരികയാണ്. കൊട്ടാരക്കര ഡിവൈ.എസ്.പി അശോകന്റെ നിര്‍ദേശപ്രകാരം പൂയപ്പള്ളി എസ്.ഐ രാജേഷ്‌കുമാര്‍, ഷാഡോ എസ്.ഐ. ബിനോജ്, എസ്.സി.പി.ഒമാരായ ഷാജഹാന്‍ ആഷിഷ് കോവൂര്‍, റെജിമോന്‍ എന്നിവര്‍ റെയ്ഡില്‍ പങ്കെടുത്തു.
ഇയാളെ ഇന്ന് കോടതിയില്‍ ഹാജരാക്കും.