ന്യൂഡല്‍ഹി: ലോക്‌സഭാ തെരഞ്ഞെടുപ്പ് നടന്ന 542 മണ്ഡലങ്ങളില്‍ 347 ഇടത്തും വോട്ടുകള്‍ തമ്മില്‍ വലിയ രീതിയിലുള്ള പൊരുത്തക്കേടുകളുണ്ടെന്ന് ചൂണ്ടിക്കാട്ടി സുപ്രിംകോടതിയില്‍ ഹരജി. തെരഞ്ഞെടുപ്പ് കമ്മിഷന്റെ താല്‍ക്കാലിക ലിസ്റ്റും അന്തിമ ലിസ്റ്റും തമ്മില്‍ അന്തരമുണ്ടെന്ന് ചൂണ്ടിക്കാട്ടിയാണ് ഹരജി.

മുതിര്‍ന്ന അഭിഭാഷകന്‍ പ്രശാന്ത് ഭൂഷണ്‍ മുഖേന അസോസിയേഷന്‍ ഫോര്‍ ഡെമോക്രാറ്റിക് റൈറ്റ്‌സ് (എ.ഡി.ആര്‍), കോമണ്‍ കോസ് എന്നീ എന്‍.ജി.ഒ സംഘനടകളാണ് ഹരജി സമര്‍പ്പിച്ചത്.

തെരഞ്ഞെടുപ്പ് കമ്മീഷന്റെ ആപ്പ് വഴി പ്രഖ്യാപിച്ച കണക്കുകളും കമ്മീഷന്‍ പുറത്തുവിട്ട താല്‍ക്കാലിക ലിസ്റ്റിലെ വിവരങ്ങളും തമ്മില്‍ പൊരുത്തക്കേടുണ്ട്. ആറ് സീറ്റുകളില്‍ ഈ വ്യത്യാസം വിജയിച്ച സ്ഥാനാര്‍ഥികളുടെ ഭൂരിപക്ഷത്തേക്കാള്‍ വലുതാണെന്നും ഹരജിയില്‍ പറയുന്നു.

17-ാം ലോക്‌സഭയിലേക്കുള്ള തെരഞ്ഞെടുപ്പ് ഏഴു ഘട്ടങ്ങളിലായാണ് നടന്നത്. മെയ് 23 നാണ് തെരഞ്ഞെടുപ്പ് ഫലം പുറത്തുവന്നത്.

“My Voter turnout app” എന്ന ആപ്പിലൂടെ ഓരോ മണ്ഡലത്തിലെയും വോട്ടിങ് ശതമാനം തത്സമയം അറിയിക്കുന്ന സംവിധാനം ഇപ്രാവശ്യം ഏര്‍പ്പെടുത്തിയിരുന്നു. ആദ്യത്തെ ആറു ഘട്ടങ്ങൡും ഇതുപ്രകാരം കൃത്യമായ വോട്ടര്‍മാരുടെ എണ്ണം കാണിച്ചിരുന്നുവെന്ന് ഹരജിയില്‍ പറയുന്നു. എന്നാല്‍ അവസാനഘട്ടമാവുമ്പോള്‍ മുന്‍പ് നല്‍കിയ എല്ലാ വിവരങ്ങളും ഒഴിവാക്കുകയും ശതമാനക്കണക്ക് മാത്രം കാണിക്കുകയും ചെയ്തുവെന്നും ഹരജിയില്‍ ചൂണ്ടിക്കാട്ടുന്നു.

വിദഗ്ധ സമിതി നടത്തിയ ഗവേഷണത്തില്‍ ഇക്കാര്യം വ്യക്തമായിട്ടുണ്ടെന്നും രണ്ടു കണക്കുകളും തമ്മില്‍ വലിയ അന്തരമുണ്ടെന്നും ഹരജിയില്‍ പറയുന്നു.

ആറ് സീറ്റുകളില്‍ ഈ വ്യത്യാസം വിജയിച്ച സ്ഥാനാര്‍ഥികളുടെ ഭൂരിപക്ഷത്തേക്കാള്‍ വലുതാണെന്നും ഹരജിയില്‍ പറയുന്നു. ആന്ധ്രപ്രദേശിലെ ഗുണ്ടൂര്‍, വിശാഖപട്ടണം, ജമ്മു കശ്മീരിലെ അനന്ത്‌നാഗ്, ജാര്‍ഖണ്ഡിലെ ഖുന്തി, ഒഡിഷയിലെ കൊരാപുത്, ഉത്തര്‍പ്രദേശിലെ മഷ്‌ലിഷഹര്‍ എന്നീ മണ്ഡലങ്ങളിലാണ് ഇത്രയും അന്തരം. അതേസമയം, ഇത് ഏതെങ്കിലും ഒരു പാര്‍ട്ടിയുമായി ബന്ധപ്പെട്ടതല്ലെന്നും പഠനത്തില്‍ പറയുന്നു.