ചെറുവത്തൂര്‍: ദേശീയപാതയില്‍ ചെറുവത്തൂര്‍ ചെക്‌പോസ്റ്റിനു സമീപം ബസും ലോറിയും കൂട്ടിയിടിച്ച് ഏഴുപേര്‍ക്കു പരുക്ക്. വലിയപറമ്പിലെ രഹാന, മടക്കരയിലെ സഫീന, മാവുങ്കാലിലെ സിദ്ധാര്‍ഥ്, ചെറുവത്തൂരിലെ റോസ് മേരി, രേഷ്മ, തടിയന്‍ കൊവ്വലിലെ നളിനി, കൈതക്കാട്ടെ സൈനബ എന്നിവര്‍ക്കാണു പരുക്കേറ്റത്.
ശനിയാഴ്ച പകല്‍ ഒന്നരയോടെയായിരുന്നു അപകടം. കാഞ്ഞങ്ങാട് നിന്നു പയ്യന്നൂരിലേക്കു വരികയായിരുന്ന സ്വകാര്യ ബസ് ടിപ്പര്‍ ലോറിയുടെ പിറകില്‍ ഇടിക്കുകയായിരുന്നു. ടിപ്പര്‍ ലോറിക്കു മുന്നിലുണ്ടായിരുന്ന ഓട്ടോ അപ്രതീക്ഷിതമായി വെട്ടിച്ചതിനെ തുടര്‍ന്നായിരുന്നു അപകടം. ഓട്ടോയില്‍ ഇടിക്കാതിരിക്കാന്‍ ടിപ്പര്‍ ലോറിഡ്രൈവര്‍ പെട്ടെന്നു ബ്രേക്കിടുകയായിരുന്നു.പിന്നാലെയെത്തിയ ബസ് ഇതിനു പിറകില്‍ ഇടിക്കുകയും ചെയ്തു.
സ്വകാര്യ ബസിലുണ്ടായിരുന്നവരാണു പരുക്കേറ്റ  ഏഴുപേരും. ഇവര്‍ ചെറുവത്തൂരിലെ സ്വകാര്യാശുപത്രിയില്‍ ചികിത്സയിലാണ്. ദേശീയ പാതയിലെ സ്ഥിരം അപകട മേഖലയാണ് ചെക്‌പോസ്റ്റ് പരിസരം.