അബുദാബി: യുഎ ഇ ദേശീയ ദിനാഘോഷത്തോടനുബന്ധിച്ചു സഹിഷ്ണുത വര്‍ഷാചരണത്തിന്റെ ഭാഗമായി അബുദാബി വനിതാ കെ എം സി സി നടത്തുന്ന സാന്ത്വന പ്രവര്‍ത്തനങ്ങള്‍ വേറിട്ടതായി.

സംസ്ഥാന പ്രസിഡന്റ് വഹീദ ഹാരിസിന്റെ നേതൃത്വത്തില്‍ പതിനഞ്ചംഗ സംഘം അബുദാബിയിലെ ഹോപ് ഗേറ്റ് ഓട്ടിസം സെന്റര്‍ സന്ദര്‍ശിച്ച് കുട്ടികളുമായി സല്ലപിച്ചും അവര്‍ക്കായി മത്സരങ്ങള്‍ സംഘടിപ്പിച്ചും ഒരു ദിനം മുഴുവന്‍ സംഘം ഓട്ടിസം സെന്ററില്‍ ചെലവഴിച്ചു.

സമൂഹത്തിന്റെ മുഖ്യ ധാരയില്‍ നിന്നകറ്റി നിര്‍ത്തപ്പെടുന്ന കുരുന്നുകളുടെ മത്സരം കൗതുകവും ആവേശവും വേറിട്ടതുമായി. ഹോപ് ഗേറ്റ് ഓട്ടിസം സെന്റര്‍ ഡയറക്ടര്‍ ഡോക്ടര്‍ മഹാ അബു സുഹ്‌രിയും അധ്യാപകരും ചേര്‍ന്ന് കെഎംസിസി വനിതാ സംഘത്തെ സ്വീകരിച്ചു.

സംസ്ഥാന ജില്ലാ നേതാക്കളായ റഹിയാന മജീദ്, സാജിദ സഫീഷ്, അജീഷ ഷിനൂഫ്, അസ്‌ലീന സമീര്‍, ശഹനാസ് ആരിഫ്, ഹസ്‌ന അഷ്‌റഫ്, ഷാഹിന, ഹസീന എന്നിവര്‍ നേതൃത്വം നല്‍കി.

സംസ്ഥാന വനിതാ കെ എം സി സി യുടെ നേതൃത്വത്തില്‍ നടക്കുന്ന സാന്ത്വന പ്രവര്‍ത്തനങ്ങളുടെ മൂന്നാം ഘട്ടമായാണ് ഓട്ടിസം സെന്റര്‍ സന്ദര്‍ശനം നടത്തിയത്. ദിലിജെന്‍ഷ്യ എന്ന പേരില്‍ നടന്ന ഏകദിന ക്യാമ്പോട് കൂടി തുടങ്ങിയ പ്രവര്‍ത്തനം റെഡ് ക്രസെന്റ് അധികാരികള്‍ക്ക് പുതുവസ്ത്രങ്ങള്‍ നല്‍കി രണ്ടാം ഘട്ടം പൂര്‍ത്തിയാക്കിയിരുന്നു. നാലാം ഘട്ടത്തില്‍ അബുദാബിയിലെ' ഓള്‍ഡ് എയ്ജ് ഹോം ' സന്ദര്‍ശിക്കുമെന്ന് വനിതാ കെ എം സി സി ഭാരവാഹികള്‍ അറിയിച്ചു.