മൂവാറ്റുപുഴ: പായിപ്ര കവലയിലെ ഗതാഗത കുരുക്ക് രൂക്ഷമാകുമ്പോഴും പഞ്ചായത്ത് ഭരണാധികാരികള്‍ കൊട്ടിഘോഷിച്ചു കൊണ്ടുവന്ന ഗതാഗത പരിഷ്‌ക്കാരം  എന്ന് നടപ്പാക്കുമെന്ന് ആര്‍ക്കും അറിയില്ല. ഇന്നലെ രാവിലെ ഉണ്ടായ ഗതാഗത കുരുക്കിനിടെ കോളജ് ബസും കാറും തമ്മില്‍ കൂട്ടിമുട്ടിയതോടെ കുരുക്ക് മുറുകി.  ഗതാഗത കുരുക്കില്‍ നിന്ന് രക്ഷപ്പെടുന്നതിനായി കോളജ് ബസിനെ മറികടന്ന് പോകാന്‍ ശ്രമിച്ച കാറ് ബസിന്റെ സൈഡില്‍ ഇടിക്കുകയായിരുന്നു.
ഗതാഗതക്കുരുക്കും അപകടങ്ങളും നിത്യേന തുടരുന്നതിനാല്‍ മാസങ്ങള്‍ക്ക്  മുമ്പ് പഞ്ചായത്ത് സമതി യോഗം ചേര്‍ന്ന് ഏകകണ്ഠമായിട്ടാണ് ഗതാഗതപരിഷ്‌ക്കരണം നടപ്പാക്കാന്‍ തീരുമാനിച്ചത്. ഇതിനായി ബന്ധപ്പെട്ടവരുടെനിരവധി  യോഗങ്ങള്‍ ചേര്‍ന്നതല്ലാതെ ഒരു കാര്യവും നടപ്പായില്ല. കവലയിലെ അനധികൃത പാര്‍ക്കിങ് തടയുന്നതിനു പുറമെ ബസ് സ്റ്റോപ്പുകള്‍ മാറ്റി സ്ഥാപിക്കുന്നതിനും പായിപ്ര റോഡില്‍ നിന്നും എം.സി റോഡിലേക്ക് വരുന്ന ബസുകള്‍ ഒഴികെയുളള ഭാരവണ്ടികള്‍ ബസ് സ്റ്റോപ്പ് റോഡ് വഴി എം.സിറോഡിലെത്തി പോകുന്നതിനും തീരുമാനമെടുത്തിരുന്നു. തീരുമാനങ്ങള്‍ യോഗത്തിനു പുറത്തേക്ക് നടപ്പായില്ല എന്നതാണ് സത്യം.
മൂവാറ്റുപുഴ  പെരുമ്പാവൂര്‍ എം.സി റോഡില്‍ പായിപ്ര പഞ്ചായത്തിന്റെ ആസ്ഥാനം സ്ഥിതി ചെയ്യുന്ന കവല ഏറ്റവും തിരക്കേറിയ പ്രദേശമാണ്. നൂറു കണക്കിന് വ്യാപാര സ്ഥാപനങ്ങളും ആരാധനാലയങ്ങളും സ്‌ക്കൂളുകളും മദ്‌റസയും മറ്റും സ്ഥിതി ചെയ്യുന്ന കവലയില്‍ ഗതാഗതക്കുരുക്കും അപകടങ്ങളും പതിവാകുകയാണ്.
ഇത് പരിഹരിക്കാന്‍ ഗതാഗത പരിഷ്‌ക്കരണം നടപ്പാക്കണമെന്ന ആവശ്യത്തിന് ഏറെ പഴക്കമുണ്ട്. നിരവധി വട്ടം ചര്‍ച്ചചെയ്ത് നടപ്പാക്കാന്‍ ശ്രമിച്ചെങ്കിലും പലവിധ സമ്മര്‍ദ്ദത്താല്‍ നടപ്പാക്കാനായില്ല.