ലഖ്‌നൗ: ഉത്തര്‍പ്രദേശില്‍ മുഖ്യമന്ത്രി യോഗി ആദിത്യനാഥും ഘടകകക്ഷി മന്ത്രി ഓംപ്രകാശ് രാജ്ബാറുമായുള്ള തര്‍ക്കം രൂക്ഷമാകുന്നു. നേരത്തെ സര്‍ക്കാരിന്റെ പിടിപ്പുകേടുമായി ബന്ധപ്പെട്ടാണ് മുഖ്യമന്ത്രിയും ഘടകകക്ഷി മന്ത്രിയും തമ്മില്‍ തര്‍ക്കമുണ്ടായിരുന്നതെങ്കില്‍, ഇപ്പോള്‍ ദൈവങ്ങളെ വേര്‍തിരിച്ചുകാണുന്നുവെന്ന ആരോപണവുമായാണ് രാജ്ബാര്‍ രംഗത്തെത്തിയിരിക്കുന്നത്.
ഹനുമാനെ ദലിതനായി ചിത്രീകരിച്ചതാണ് യോഗിക്കെതിരേ ഓംപ്രകാശ് രംഗത്തെത്താന്‍ കാരണം. ഷാമില്‍ ജില്ലയില്‍ നടന്ന ഒരു യോഗത്തിലാണ് പിന്നോക്ക ക്ഷേമ മന്ത്രികൂടിയായ ഓംപ്രകാശ് സ്വന്തം സര്‍ക്കാരിനെയും മുഖ്യമന്ത്രിയെയും വിമര്‍ശിച്ചത്. ജാതിയുടെ പേരില്‍ ദൈവങ്ങളെ വേര്‍തിരിക്കുകയാണ് മുഖ്യമന്ത്രി ചെയ്യുന്നത്. ഹനുമാന്‍ ദലിതനാണെന്നു മുഖ്യമന്ത്രി പറഞ്ഞതിനെ തുടര്‍ന്ന് ഹനുമാന്‍ ക്ഷേത്രങ്ങളെല്ലാം ദലിതര്‍ക്കു വിട്ടുനല്‍കണമെന്ന ആവശ്യവുമായി ജനങ്ങള്‍ തെരുവിലിറങ്ങുകയാണ്. സമൂഹത്തെ ജാതീയമായി വേര്‍തിരിക്കാനാണ് സര്‍ക്കാര്‍ ശ്രമിക്കുന്നതെന്നും അദ്ദേഹം ആരോപിച്ചു.
രാജസ്ഥാനിലെ ആള്‍വാറില്‍ തെരഞ്ഞെടുപ്പ് റാലിയിലാണ് ഹനുമാനെ ദലിതനായി ചിത്രീകരിച്ചു യോഗി വിവാദ പരാമര്‍ശം നടത്തിയിരുന്നത്. ഹനുമാന്‍ വനവാസിയും ദരിദ്രനും ദലിതനുമാണെന്നാണ് യോഗി പറഞ്ഞത്. ഈ പരാമര്‍ശത്തിനു പിന്നാലെ രാജ്യത്തെ ഹനുമാന്‍ ക്ഷേത്രങ്ങളെല്ലാം കൈമാറണമെന്നും ഇവിടങ്ങളില്‍ പൂജാരിമാരായി ദലിതരെ നിയോഗിക്കണമെന്നും ഭീം ആര്‍മി അധ്യക്ഷന്‍ ചന്ദ്രശേഖര്‍ ആവശ്യപ്പെട്ടിരുന്നു.