മട്ടന്നൂര്‍: നഗരസഭയിലെ ഒന്‍പതാം വാര്‍ഡായ പെരുവയല്‍ക്കരിയില്‍ വാര്‍ഡ് നിലനിര്‍ത്താന്‍ സി.പി.എമ്മും പിടിച്ചെടുക്കാന്‍ യു.ഡി.എഫും തമ്മില്‍ പോരാടും. വിഭജനത്തിലൂടെ മുണ്ടയോട് വാര്‍ഡിലേക്കു കുറച്ച് വീടുകള്‍ മാറിയതോടെ വോട്ടര്‍മാരുടെ എണ്ണത്തില്‍ ഇവിടെ കുറവുണ്ടായിട്ടുണ്ട്. 

കഴിഞ്ഞതവണ 1002 വോട്ടര്‍മാരുണ്ടായിരുന്ന ഇവിടെ ഇത്തവണ 806 വോട്ടുകളായി ചുരുങ്ങിയിട്ടുണ്ട്. ഇക്കുറി സി.പി.എം ഏരിയാകമ്മിറ്റി അംഗം വി.കെ. സുഗതനും കോണ്‍ഗ്രസിലെ കെ. ബാലകൃഷ്ണനും തമ്മിലാണു മത്സരം. എന്‍.ഡി.എയുടെ പി. ശ്രീനേഷും രംഗത്തുണ്ട്. ഇടതുപക്ഷത്തിനു വേരോട്ടമുള്ള പ്രദേശത്ത് തങ്ങള്‍ക്ക് അനുകൂലമാകുമെന്ന് അവര്‍ പറയുമ്പോള്‍ രാഷ്ട്രീയ സാഹചര്യങ്ങളും വാര്‍ഡിലെ വികസനമില്ലായ്മയും വോട്ടായി മാറുമെന്ന പ്രതീക്ഷയാണു യു.ഡി.എഫിന്.
2012ല്‍ സി.പി.എമ്മിലെ കെ. ശോഭനയ്ക്ക് 484 വോട്ട് ലഭിച്ചപ്പോള്‍ കോണ്‍ഗ്രസിലെ കെ.പി. ഷീജയ്ക്കു 350 വോട്ടും ലഭിച്ചു. 134 വോട്ടായിരുന്നു ശോഭനയുടെ ഭൂരിപക്ഷം.