കോഴിക്കോട്: സ്ത്രീസുരക്ഷ ഉറപ്പുവരുത്താന്‍ ശക്തമായ നിയമങ്ങള്‍ വേണമെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍. കേരള മഹിളാ സംഘം സംസ്ഥാന കമ്മിറ്റി കെ.പി കേശവമേനോന്‍ ഹാളില്‍ സംഘടിപ്പിച്ച യശോദ ടീച്ചര്‍ ജന്മശതാബ്ദി ആഘോഷ സമാപനം ഉദ്ഘാടനം ചെയ്യുകയായിരുന്നു അദ്ദേഹം.
ലിംഗതുല്യതയ്ക്കായുള്ള ശ്രമങ്ങളെ പ്രോത്സാഹിപ്പിക്കുന്ന നവോത്ഥാന പ്രസ്ഥാനങ്ങള്‍ക്ക് സ്ത്രീസ്വാതന്ത്ര്യത്തിനു വേണ്ടി ശക്തമായ പോരാട്ടങ്ങള്‍ നടത്തിയ പാരമ്പര്യമുണ്ടെന്നും അദ്ദേഹം പറഞ്ഞു. ചടങ്ങില്‍ കമലാ സദാനന്ദന്‍ അധ്യക്ഷയായി. പി. വസന്തം അനുസ്മരണ പ്രഭാഷണം നടത്തി. ടി.വി ബാലന്‍, എം. നാരായണന്‍, പി.പി വിമല, രമണി ജോര്‍ജ് പങ്കെടുത്തു.