മാഡ്രിഡ്: ലാലിഗയില്‍ ബാഴ്‌സലോണ വീണ്ടും ഒന്നാം സ്ഥാനത്ത് തിരിച്ചെത്തി. ഇന്നലെ നടന്ന മത്സരത്തില്‍ എതിരില്ലാത്ത ഒരു ഗോളിന് അത്‌ലറ്റികോ മാഡ്രിഡിനെ പരാജയപ്പെടുത്തിയതോടെയാണ് ബാഴ്‌സ ഒന്നാം സ്ഥാനത്തേക്ക് തിരിച്ചെത്തിയത്.
ഈയിടെയായിരുന്നു ബാഴ്‌സലോണയുടെ ഒന്നാംസ്ഥാനം നഷ്ടപ്പെട്ടിരുന്നത്. 86-ാം മിനുട്ടിലാണ് ലയണല്‍ മെസ്സി വിജയ ഗോള്‍ സ്വന്തമാക്കിയത്. 67 ശതമാനവും പന്ത് കൈവശംവച്ച് കളിച്ച ബാഴ്‌സക്ക് നേരത്തെ ഗോള്‍ കണ്ടെത്താനായില്ല. അവസരം കിട്ടുമ്പോഴെല്ലാം അത്‌ലറ്റികോ മാഡ്രിഡ് താരങ്ങള്‍ ബാഴ്‌സയുടെ ഗോള്‍മുഖത്ത് ഭീതി വിതച്ചു.
പല അവസരത്തിലും കീപ്പര്‍ ടെര്‍ സ്റ്റഗനാണ് ബാഴ്‌സയുടെ രക്ഷകനായത്. നാല് ഗോള്‍ ലൈന്‍ സേവുകളാണ് സ്റ്റിഗന്‍ നടത്തിയത്. 31 പോയിന്റുമായിട്ടാണ് ബാഴ്‌സ ഒന്നാം സ്ഥാനത്തെത്തിയിട്ടുള്ളത്. രണ്ടാം സ്ഥാനത്തുള്ള റയല്‍ മാഡ്രിഡിനും 31 പോയിന്റ് തന്നെയാണുള്ളത്. ഗോള്‍ ഡിഫറന്‍സിലാണ് ബാഴ്‌സ മുന്നിലെത്തിയിട്ടുള്ളത്. 30 പോയിന്റുള്ള സെവിയ്യ മൂന്നാം സ്ഥാനത്തും തുടരുന്നു. കഴിഞ്ഞ ദിവസം നടന്ന മറ്റൊരു മത്സരത്തില്‍ വന്‍സിയ 2-1 എന്ന സ്‌കോറിന് വിയ്യാറയലിനെ പരാജയപ്പെടുത്തി. എതിരില്ലാത്ത ഒരു ഗോളിന് സെവിയ്യ ലഗാനസിനെ പരാജയപ്പെടുത്തി.
2-0 എന്ന സ്‌കോറിന് അത്‌ലറ്റികോ ബില്‍ബാവോ ഗ്രാനഡയെ പരാജയപ്പെടുത്തി. ഒസാസുനയോട് 4-2 എന്ന സ്‌കോറിന് എസ്പാനിയോള്‍ പരാജയപ്പെട്ടു. മറ്റൊരു മത്സരത്തില്‍ എതിരില്ലാത്ത നാല് ഗോളിന് ഗറ്റാഫെ ലെവന്റെയെ പരാജയപ്പെടുത്തി.