ദമാം: സഊദിയിൽ മൂന്നു വയസുകാരി വിഴുങ്ങിയ മാലമുത്തുകൾ ഡോക്ടർ സംഘം അതി സാഹസികമായി പുറത്തെടുത്തു. കിഴക്കൻ സഊദിയിലെ വ്യാവസായിക നഗരിയായ ജുബൈൽ റോയൽ കമ്മീഷൻ ആശുപത്രിയിലെ സംഘമാണ് അന്നനാളത്തിൽ കുടുങ്ങിയ മുത്തുകൾ പ്രത്യേക ഉപകരണം ഉപയോഗിച്ച് സാഹസികമായി പുറത്തെടുത്തത്. മാഗ്നറ്റിക് രൂപത്തിലുള്ള 36 മുത്തുകളാണ് കുട്ടി വിഴുങ്ങിയിരുന്നത്. ഏറെ അപകട സാധ്യതയുള്ള സംഭവത്തിൽ കുഞ്ഞ് യാതൊരു രക്ഷപ്പെടുകയായിരുന്നു.  ശസ്‌ത്രക്രിയ ആവശ്യമായി വരുമായിരുന്ന സ്വദേശി ദമ്പതികളുടെ മൂന്ന് വയസുകാരി വിഴുങ്ങിയ മുത്തുകൾ ഏറെ പണിപ്പെട്ടാണ് സംഘം പുറത്തെടുത്തത്.

        വീട്ടിലുള്ളവരുടെ കണ്ണ് വെട്ടിച്ച് മാല രൂപത്തിലുള്ള സാധനം പൊട്ടിച്ച് അതിലെ മുത്തുകൾ ഓരോന്നായി മൂന്ന് വയസുകാരി വിഴുങ്ങുകയായിരുന്നു.  സംഭവം ശ്രദ്ധയിൽ പെട്ടപ്പോഴേക്കും ഏകദേശം മുഴുവൻ മുത്തുകളും കുട്ടി വിഴുങ്ങി കഴിഞ്ഞിരുന്നു. ശർദിയടക്കമുള്ള അസ്വസ്ഥകൾ പ്രകടിപ്പിക്കുകയും ചെയ്‌തതോടെ ഉടൻ തന്നെ റോയൽകമ്മീഷൻ ആശുപത്രിയിൽ പ്രവേശിപ്പിച്ചു. തുടർന്ന് നടത്തിയ സ്‌കാനിങ്ങിൽ ഇവ കണ്ടെടുത്തതോടെ പുറത്തെടുക്കാൻ ശ്രമിച്ചപ്പോൾ ഇവ അന്നനാളത്തിലേക്ക് ഇറങ്ങി. ഇവിടെ നിന്നാണ് ഈസോ ഫാഗോ സ്‌കോപ്പി വഴി പുറത്തെടുത്തത്.