കോഴിക്കോട്: ഫാറൂഖ് കോളജ് പൂര്‍വ വിദ്യാര്‍ഥി സംഗമം ഫൊസ്റ്റാള്‍ജിയ 2017 നാളെ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. നാളെ രാവിലെ ഒന്‍പതര മുതല്‍ ഫാറൂഖ് കോളജ് കാംപസിലാണ് പരിപാടി നടക്കുക. 1948 ല്‍ സ്ഥാപിതമായ ഫാറൂഖ് കോളജില്‍ നിന്ന് ഇതുവരെയായി വിവിധ വകുപ്പുകളില്‍ നിന്ന് അറുപതിനായിരത്തോളം വിദ്യാര്‍ഥികള്‍ പഠിച്ച് പുറത്തിറങ്ങിയിട്ടുണ്ട്. ഇത്തവണത്തെ സംഗമത്തിന്റെ ഭാഗമായി കോളജിലെ രസതന്ത്രവിഭാഗവുമായി സഹകരിച്ച് വാട്ടര്‍ അനലൈസിങ് ലബോറട്ടറി ആരംഭിക്കുമെന്ന് ഭാരവാഹികള്‍ അറിയിച്ചു. കോളജിലെ പൂര്‍വ വിദ്യാര്‍ഥികളായ കാലിക്കറ്റ് സര്‍വകലാശാല വൈസ് ചാന്‍സിലര്‍ ഡോ. കെ മുഹമ്മദ് ബഷീര്‍, ചരിത്രകാരനായ എം.ജി.എസ് നാരായണന്‍ എന്നിവര്‍ ഫൊസ്റ്റാള്‍ജിയ 2017ല്‍ മുഖ്യാതിഥികളാവും. വാര്‍ത്താ സമ്മേളനത്തില്‍ പ്രിന്‍സിപ്പല്‍ ഇ.പി ഇമ്പിച്ചിക്കോയ, ഫോസ പ്രസിഡന്റ് കെ. കുഞ്ഞലവി, സെക്രട്ടറി പി.ഇ മുഹമ്മദ് അബ്ദു റഷീദ് പങ്കെടുത്തു.