മലയിന്‍കീഴ്: വീട് കയറി ഗ്യഹനാഥനെയും ഭാര്യയേയും മകനേയും മരുമകളേയും  ആക്രമിച്ച കേസ്സില്‍ അഞ്ചു പേരെ മലയിന്‍കീഴ് പൊലിസ് പിടികൂടി.
ചൂഴാറ്റുകോട്ട അമ്പിളി എന്നു വിളിക്കുന്ന അമ്പിളി, അമ്പിളിയുടെ സുഹ്യത്തുക്കളും ചൂഴാറ്റുകോട്ട സ്വദേശികളുമായ സുനില്‍കുമാര്‍, ചന്തു എന്നു വിളിക്കുന്ന സന്തോഷ്‌കുമാര്‍, ജോണി, രാജു എന്നിവരാണ് അറസ്റ്റിലായത്. പൊലിസ്
പറയുന്നത്: ഞായറാഴ്ച രാത്രി പ്രതികള്‍  വിളവൂര്‍ക്കല്‍ ചൂഴാറ്റുകോട്ട വേങ്കൂര്‍ കല്ലുപാലത്തിനു സമീപം പാലയ്ക്കല്‍ വീട്ടില്‍ ശശിധരന്‍നായരുടെ വീട്ടിലെത്തി ബഹളമുണ്ടാക്കി. പണമിടപാടായിരുന്നു കാരണം. വാക്കേറ്റം കയ്യാങ്കളിയിലായി. തുടര്‍ന്ന്  ആയുധങ്ങളുമായി എത്തിയ ഇവര്‍ ആക്രമണം നടത്തുകയായിരുന്നു.
മദ്യപിച്ച് എത്തിയ സംഘം പ്രദേശത്ത് ഭീകരാന്തരീക്ഷവും സൃഷ്ടിച്ചു.ശശിധരന്‍നായര്‍, ഭാര്യ സുഗന്ധകുമാരി, മകന്‍ അജയന്‍, അജയന്റെ ഭാര്യ സൗമ്യ എന്നിവര്‍ പരുക്കുകളോടെ ആശുപത്രിയിലായി. സംഭവത്തെ തുടര്‍ന്ന് ഒളിവില്‍ പോയ പ്രതികളെ രഹസ്യ കേന്ദ്രത്തില്‍ നിന്നാണ് പിടികൂടിയത്.
വെള്ളറട: പെണ്‍കുട്ടിയെയും മാതാവിനെയും വീട്ടില്‍കയറി ആക്രമിച്ച കേസിലെ  പ്രതി പിടിയില്‍. ഉണ്ടന്‍കോട് തെക്കിന്‍കര വീട്ടില്‍ സുരേഷ് (46) ആണ് പിടിയിലായത്.
ഒരുമാസം മുമ്പാണ് കേസിനാസ്പദമായ സംഭവം. ആക്രമണം നടത്തിയശേഷം ഒളിവില്‍പ്പോയ പ്രതിയെ എസ്.ഐ അജേഷിന്റെ നേതൃത്വത്തിലുള്ള സംഘമാണ് പിടികൂടിയത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.